ORANJESTAD – Parlamentario Endy Croes den un racha di documentonan cu awor ta mirando luz di dia ta sinti e deber pa trece esakinan den claridad pa pueblo por compronde e grado di sinberguenseria cu a tuma luga.

E activistanan di AVP nombra pa Mike Eman y Mike de Meza den Bestuur di Lotto a perde tur sentido di fatsoen na e manera cu nan tabata aproba pa malgasta fondonan di Lotto pa Deporte. Flavio Faneyte kende ta un hefe na Elmar tambe ta miembro di Bestuur di Lotto y ta masha amigo di Benny (I don’t give a damn) Sevinger mester para responsabel pa su actonan den temponan nos dilanti.

Kisas ta cerca Benny Sevinger Flavio Faneyte hefe na Elmar a practica su modus operandi? Con bin cu Flavio Faneyte a aproba mas cu 1 miyon florin pa paga abogadonan amigo di AVP? Con por ta posibel Flavio Faneyte un hefe di Elmar por a aproba mas di 1.5 miyon na companianan pa investiga y persigui diferente conciudadano? Pues mas di 2.5 miyon di placa di deporte a wordo abusivamente malversa. Flavio Faneyte nunca a puntra su mes con hopi e por a yuda deporte en general y canchanan deportivo cu e placanan aki?

Actonan fraudulento
Awe nos ta publica un parti masha chikito di un lista masha largo cu nos tin di un otro miembro di Bestuur: Arnold Legrand un amigo personal di Mike de Meza y Mike Eman.

E cabayero aki siendo miembro di bestuur y ta cobra un balente vergoeding alaves ta cana cu un celular cu Lotto ta paga a dicidi di crea un formula pa e mes brinda Lotto servicio di IT. Su compania IT Pro NV  ta registra na Brazil # 88 y tin un solo doño cual ta Arnold Le Grand. Arnold Le Grand cu bendicion di Bestuur tanto Flavio Faneyte un hefe di Elmar N.V, y Silvio Janga otro pensionado amigo di Mike Eman y Mike de Meza ta entre esunnan cu tabata aproba e actonan fraudulento y actonan di sinberguenseria aki. Arnold Legrand tabata cobra masha hopi placa di fondonan di Lotto.

Falta di etica y moral
Tristo pa mira deporte sufriendo, atletanan den solo ta sclama pa nan fair share mientras Bestuur tabata crea trabao pa nan mes y biba manera miyonario.

Es mas Arnold ta tur siman den casino ta gamble placa di Lotto. Adhunto un lista di administratie di den Lotto con e pagonan tabata core pa Arnold su compania IT Pro. Mesun compania aki tambe a strica masha hopi placa den RDA cual nos lo bin despues riba dje.  Pues maneho di Flavio Faneyte y Silvio Janga hunto cu Arnold Legrand ta totalmente contra “Good Governance Code” y contra tur etica y moral.

Algun hende lo bay para responsabel pa e actonan aki. Parlamentario Endy Croes su lucha ta pa deportistanan por recupera Lotto pa deporte bek y cu e placa di deporte por yega na e deportistanan directamente. Pueblo ta cumpra Lotto cu e creencia cu e fondonan aki ta bay pa deporte y no pa e “clan” di amigonan di Mike Eman y Mike de Meza.