Parlamentario Endy Croes – analisando casonan penal pendiente – ta visualisa cu durante aña 2020 lo bay scucha masha hopi di e dos casonan grandi di fraude y corupcion di ex ministernan di AVP, tanto di e caso IBIS di Paul Coes cual ta den Hoge Beroep como e caso Avestruz di Benny Sevinger cual lo mester wordo presenta ainda den Corte di Prome Instancia. Ambos caso ta casonan penal contra ex ministernan di AVP. 

Paul Croes y Caso IBIS.
Paul Croes den caso IBIS a wordo acusa pa 6 acusacion penal hopi grave entre otro 1)  Soborno, 2) Haci mal uso di su posicion como minister, 3) Comete malversacion, 4) Labamento di placa, 5) Mensensmokkel, hende ilegal trahando na su cas y 6) Participacion na un organisacion criminal. Dia 22 di februari 2019 Hues a haya Paul Croes culpabel y a sentencia Paul Croes na 4 aña di prizon mas 9 aña cu Paul no por cubri ningun funcion den gobierno. Hues a amplia riba tur e 6 puntonan ariba menciona. Na e punto 6 esta Organisacion Criminal Hues a skirbi lo siguiente den su veredicto final  riba pagina 23 bou di titel: Feit # 6 , Criminele organisatie:”Uit hetgeen hiervoor is overwogen ten aanzien van de feiten 1 en 3 volgt dat verdachte (Paul Croes, ex minister AVP), in bewuste en nauwe samenwerking met anderen, jarenlang misdrijven heeft gepleegd. Hij maakte zich structureel schuldig aan het aannemen van steekpenningen (soborno) en werd daarbij geholpen, onder anderen medeverdachten Aparicio, Capriles, Filiciana en Arends”.   Hues ta splica cu ta comproba cu Paul Croes di AVP ta culpabel. Contra e sentencia aki Paul Croes a bay den Hoge Beroep unda den 2020 un total di 3 Hues lo revisa e caso y e sentencia y lo duna un veredicto nobo. Parlamentario Endy Croes ta premira cu no lo bin mucho cambio den esaki como cu e pruebanan contra Paul Croes ta fuerte y contundente.

Benny Sevinger y Caso Avestruz.
Den caso di e di dos ex minister corupto y fraudulento di AVP esta Benny Sevinger nos ta premira cu detencionnan lo cuminsa cay den e prome kwartaal di aña 2020. Pues pa mas tarda den luna di maart of prome Aruba lo bay wordo sacudi cu persona(nan) cu a grita duro den prensa y/of ex minister(nan) lo wordo priva di nan libertad pa conclui e investigacion cual despues lo wordo presenta dilanti Hues. Benny Sevinger aparentemente a duna su cooperacion ‘willens en wetens’ pa bende diferente  opties riba terenonan comercial mediante un construccion di bende shares di NV unda e tereno ta wordo bendi cune. Tabatin caso cu un NV no tabata ni lanta mes ainda y Benny a duna su cooperacion pa e sharesnan di un futuro NV wordo bendi unda tereno a bay cune te cu e tereno a wordo bendi.

Tin caso di otro ex candidato di AVP Gaby Werleman unda compañante a bende un solo tereno pa 3.5 miyon US dollar den construccion similar. Asina e organisacion criminal cu  Benny Sevinger tabata participa na dje tabata opera. Investigacion lo bin cu tur detaye. Parlamentario Endy Croes no ta mira cu hendenan por scapa den e caso grandi di corupcion cu patrimonio di pueblo cu a tuma luga. Locual ta frapante cu ambos caso grandi ta di ex ministernan di AVP. Nos lo keda pendiente pa informa pueblo como cu 2020 lo bira e aña di husticia cual pueblo tanto ta anhela pe.