Parlamentario Endy Croes ta splica cu e ta sinti un berguensa grandi ora tende Mike de Meza papia. Pa 8 aña bo a sinta den e funcion como Minister di Finansas cual at all bo no ta domina y bo echonan ta mustra e desaster financiero y MEGA DEBE cu bo a causa, pero no solamente esey, bo tabata Minister di Energia tambe y a logra net net nada riba e tereno ey. Mas bien bo a mara Aruba cu un contracto di 2000 pagina di Citgo cu abo so a lesa y awe e Gobierno aki ta pega cu e consecuencia bochornoso di bo actonan.
Hedging criminal
Kico Aruba a haci AVP, Parlamentario Croes ta puntra su mes? Kico Aruba a haci Mike de Meza y Mike Eman di AVP pa nan por a trata e pueblo y e homber humilde na e manera aki? Boso no tabata pensa riba e pueblo? Boso tabata capaz pa trata Aruba di e manera aki? Mike De Meza pa cuminsa a “Hedge” WEB costando pueblo casi 300 miyon florin pa su mal decision. Pueblo ta corda con Mike a grita den Parlamento na aña 2012 cu prijs di crudo lo alcansa 500 dollar pa bari na aña 2015? P’esey el a duna ordo pa hedge 100% di e total di fuel cu WEB ta uza. Mike de Meza segun Parlamentario Croes tabata mira e prijs di Crudo traves di hendenan cu ta huma “CIGA” y no traves di expertonan sino hamas e por a papia un disparate asina den Parlamento. A spanta pueblo pa por a haci su fechorianan.
Prohibi pa lubida
Mas tristo ta cu nan a hedge 100% pa 3 aña largo caminda antes tabata hedge pa 3 luna (bao di MEP) y asina e risico tabata mucho mas bao control. Momento cu Mike de Meza a duna ordo na WEB pa hedge 100% di e total di fuel pa 3 aña e prijs tabata 92 dollar pa bari e momento ey. A resulta cu ni un luna despues prijs di crudo a drop alcansando 30 dollar pa bari. Pues mundo tabata probecha di esaki na 30 dollar pa bari mientras Aruba a keda sufri pagando 92 dollar pa bari cual a costa pueblo alrededor di 300 miyon florin. Pa e decision descabeya di Mike De Meza Aruba no por a probecha di e rebaho aki pa casi 4 aña largo. Prohibi pa lubida!! Dia 1 di october 2014 a bay manifesta hustamente pasobra prijs di awa y coriente a aumenta bira casi impagabel. Riba “ordo” di Mike de Meza y Mike Eman Riot commando a bati un pueblo indefenso, sernan femenino a wordo lastra malamente riba caminda dilanti edificio di Parlamento. Pueblo ta haya cu esaki ta e trato cu pueblo merece?
Moralidad y respet
Ainda siman pasa Mike Eman y Mervin Wyatt Ras den e retorica di Mike Eman ta expresa den prensa cu AVP a logra baha prijs di coriente cu 35% mientras Parlamentario Croes cu rapport di WEB den man por a ilustra con AVP ta gaña y manipula atrobe como cu prijs di coriente bou AVP a aumenta cu 35.7% y esaki ta un “vaststaand feit” di acuerdo cu rapport di WEB. Parlamentario Endy Croes ta splica cu un hende normal mester tin honor y dignidad como standardnan halto den bida. Un ser humano mester por tin moralidad y respet pa su mes y respet pa su pueblo. Un hende mester por ta transparente. Politiconan di AVP ta carece di tur esakinan y den nan actuacion cuminsando cu por ehempel robonan di tereno, hedging, contracto cu deal corupto cu Citgo cu un board cual tur ta cera, maneho desastroso firmando PPP pa loco cu pueblo mester paga awor, prestamento di averahe 400 miyon pa aña pa cubri deficitnan monstruoso pa cu nan maneho a lo loco ta splica hopi di miembronan di AVP pasobra tanto Parlamentarionan di AVP como Ministernan corupto di AVP a sostene esaki keriendo cu nan lo ta “untouchable”. Pues na Mike de Meza, no papia abo di Citgo mes. Calladito te ves mas bonito!
