Parlamentario Endy Croes ta haci apelacion riba nos comunidad pa nos uni. Cu tur hende mirando den e mesun direccion luchando pa e mesun causa comun nos ta logra. Mundo henter ta den un crisis di corona virus unda nos a ricibi algun señal di nos Todo Poderoso. Ningun di nos ta compronde esaki ainda.
Kico e señalnan aki ta significa pa humanidad? Kico e mensahe ta? Un dia nos lo compronde. Nos ta bringando un enemigo cu nos no por ni mira. Miho forma pa bring’e y control’e ta pa Keda Cas! Stop di Plam’e! Parlamentario Endy Croes sinembargo ta preocupa cu un porcentahe di nos propio hendenan no ta obedece ordo di nos gobierno y dirigentenan di nos pais. Nos tin un Minister Presidente Evelyn Wever Croes trahando incansabel dia y nochi pa proteha nos comunidad. Nos demas Ministernan tur trahando super duro dirigiendo e pais aki den momentonan sumamente dificil. Nos departamentonan y sigur DVG trahando incansabel. Nos personal trahando den salubridad haciendo nan maximo esfuerso cu tiki descanso. Nos no kier ni pensa mes locual ta tumando hogar na Italia y Spaña por ehempel. Unico cos cu pueblo mester aporta na dje ta Keda Cas y sigui instruccion. Si bo sali corda di mantene distancia, laba man, no sunchi y no brasa. No bishita nos grandinan of esnan mas vunerabel. Pues no ta hopi locual gobierno ta pidiendo y ta bogando pa pueblo por cumpli. Ban mustra nos grado di disciplina. Ban mustra nos sentido comun un pa cu otro. Ban mustra solidaridad pa cu otro. Momento nan dificil ta na caminda. Nos tur ta bay tin mester di otro riba e pida baranca aki pa hunto nos saca Aruba bek padilanti. Parlamentario Endy Croes ta pidi comunidad pa ban cumpli y hunto den harmonia nos traspasa e temponan dificil nos dilanti.
