Parlamentario Endy Croes a splica cu Aruba ta recuperando lentamente. Desde november 2017 Aruba tin un gobierno nobo. Ta na su luga pa rato rato recorda pueblo di e situacion con a hereda Aruba.

Momento Gobierno nobo a asumi nan entrada, nan no a ricibi un traspaso pero mas bien Mike Eman y AVP a deshaci di tur documento, delete harddisk di Cocolishi por completo, a corta tur waya y kabelnan di Setar den edificio y te hasta ladronicia di ekiponan a tuma luga door di cierto coordinadornan, te hasta minister. Nos por corda un carta cu Schwengle a manda cu e lo paga pa cierto ekiponan cu no tabata t’ey mas. Asina coalicion mester a cuminsa goberna cu 0 informacion y a dura casi un luna pa gobierno tabata up and running.

Durante e mesun luna aki a cuminsa detecta diferente documento cu contractonan manera TNO y Phillips na balor di 10 miyon florin. Cifranan real a cuminsa drenta unda Mike Eman a percura pa un ‘ondeugdelijk bestuur’ y unda nos florin tabata na rand pa devalua. Un debe cual a alcansa 93% di nos GDP. Pues 93 cen di cada florin ta bay pa paga debe. Riba placa cu Mike Eman a presta, interes a alcansa 232 miyon florin cual ta mas cu 600 mil pa cada dia.

Pa loke ta e proyectonan PPP desde 2019 e gobierno aki ta sinta cu e batata cayente di e maneho  desastroso di Mike Eman, Benny Sevinger, Mike De Meza y AVP unda pueblo di Aruba mester paga 80.9 MIYON pa aña pa 20 aña largo. No por lubida Mike Eman su fiesta riba e brug cu a costa pueblo 142 mil pa un solo anochi. Un hende cu ta cobra minimum loon di 1700 florin pa luna  lo alcansa 142 mil den 7 aña di trabao. Abuso toch, pueblo? Un debe cual Mike a redobla den 8 aña sin gevoel. Anto pa pueblo paga!!

Mike mes a grita esaki den Parlamento cu e ta orguyoso di e debe y cu pueblo lo bay pag’e den futuro. Asina mes cu tur carta contra e coalicion aki nos a sa di sali dilanti rescatando pais Aruba pa por pone Aruba bek riba e railsnan corecto. No ta algo facil. Hopi hende kier mira e cambio di anochi pa mainta. Esaki sigur no ta traha asina, primordialmente e estado catastrofico cu Mike y AVP a laga Aruba aden. Aruba ta bayendo den un bon direccion.

Despues di a atende cu e desaster poco poco e proximo dos añanan nos dilanti pueblo lo bay sinti e “spin off” den nos economia, Croes ta termina bisando.  Manera nos grandinan ta bisa poco poco pero sigur.