Parlamentario Endy Croes(MEP): “Arthur Dowers ta cuestiona Prome Minister, pero Dowers mester busca e caha di triki di 300 mil cu el a uza di casa pa casa” 

Parlamentario Endy Croes ta splica cu no obstante cu e tabata den exterior pa atende Juegos Panamericanos el a keda mantene su mes altante di e disparatenan cu AVP y su ex mandatarionan debil hambra pa poder ta trece dilanti. Awe sinembargo lo dedica un tiki tempo pa contesta Dowers, esta e ex minister di Husticia fracasa. E mesun ex minister cu a destrui e radarnan y a kibra contracto di helicopter. Consecuentemente Aruba a bira insigur unda tur santo dia tabatin un atraco.

Retorica bieu y disco raya
Desde cambio di gobernacion y desde cu a core cu Dowers for di poder Aruba a sinti mesora un aire di trankilidad. Dowers ta splica pueblo cu Prome Minister Evelyn Wever Croes lo a uza un caha di triki  contra pueblo. Bon, ta unda Dowers tabata 8 aña cu Mike de Meza y Mike Eman pa destrui e pais aki financieramente? Dowers a subi su cabay di troya di aña 2009 y kier indoctrina pueblo cu e gobierno actual lo ta traha pa “Friends & Family”. Pues e retorica bieu di e disco raya di Mike Eman y AVP. Laga nos recorda Dowers su memoria riba Friends & Family. Anto Dowers mes por bin afo den su proximo conferencia di prensa y splica pueblo cual ta friends y cual ta family.

Partido sinonimo na sinberguensa
Dowers tempo cu e tabata minister a duna un tal Patricia Dowers como Afl. 300 mil di gobierno sin conta companianan estatal cual den futuro cercano lo mira luz di dia. Dowers por splica pueblo e sumanan entre otro di Afl. 43.737,-, un otro di Afl. 51.354,-, un otro di Afl. 15.300,-, un otro di Afl. 61.279,-, Afl. 36.311,-, Afl. 39.778,- cu un tal Patricia a cobra, si esaki ta Friends of ta Family? Cu tur respet pa tur profesional pero momento cu Dowers kier hunga politica barata e mester para fuerte pa su propio actonan. AVP ta un partido sinonimo na sinberguensa y mayoria di nan integrantenan ta corupto y ladron y a hinca e pueblo aki den un miseria cual ta keda dificil pa maneha. Dowers a contrata entre otro Patrick Paskel cu Speed mediante un compania PAXI di casa di Patrick Paskel  (Theragroup) cu un PR overeenkomst na balor di Afl.7,7762.50 pa luna. (Cifranan di Finansas Publico). Mi ta laga Dowers mes splica pueblo si PAXI ta friends of family. Esaki no ta tur.

Mientras Patrick Paskel manera carpata pega na Mike Eman tabata ranca delaster un sanger di e pueblo aki cu Thera Group, e casa ta teni na Dowers y Dowers cooperando den grandi. KPA cu un contracto di Afl.10.000,- pa luna, pues asina el a wordo geboek. PAXI a cobra den un solo aña rond 215 mil cerca Dowers so mientras PAXI banda di Thera Group cu a strica riba 6 miyon tambe a strica 1.3 miyon di gobierno pa propaganda gobierno. Un otro ta abogado Sjiemfat kende a cobra 5.2 miyon for di gobierno sin conta companianan estatal. Richard Arends cu su Horizon Consultancy a cobra rond 4 miyon pa duna conseho. Asina por keda menciona un cantidad mas.

Cual ta friends y cual ta family?
Parlamentario Endy Croes ta “challenge” Dowers pa e bin dilanti y splica si e sumanan aki duna na e companianan aki ta duna na Friends of ta duna na Family? Pues momento cu Dowers kier lanta calumnia di Friends & Family e por cuminsa na splica pueblo di su Friendsnan & Familynan, cual ta friends y cual ta family cu a cobra e sumanan aki riba menciona.

Parlamentario Croes a sigui bisa cu desde januari 2018 el a yega di publica esakinan, pero lo bay saca e tabelnan di sumanan  aki bek den prensa pasobra AVP y Dowers kier hunga e politica cu pueblo ta lubida lihe. Pero e biaha aki nan careda di bina lo caba pasobra como Parlamentario nos lo uza tur forsa di e “toolsnan” cu ta na nos alcance pa keda recorda pueblo di e desaster cu Dowers y AVP a crea y laga atras pa nos yiunan kendenan pa e proximo 20 añanan lo mester bay paga pa esaki. Staatssecretaris di Hulanda tambe a splica cu na 2039 lo logra baha e debe di Mike Eman aki pa rond 50% di GDP. Pues aki 20 aña e lo alcansa alrededor di unda MEP tabata tin’e na 2009, esta 43%. Pues ta hustamente e wheel and deal di Dowers, Mike Eman y nan gang cu nan friends & family a hinca Aruba den e Mega Debe.

Parlamentario Croes lo desea di scucha Dowers reacciona riba e echonan cu Croes a menciona aki riba y no beat around the bush, pero “be a man” y reacciona manera homber para den su sapato.