Parlamentario Endy Croes ta haya cu reunion di Parlatino na Panama no ta costoso

Miembronan di parlamento di Aruba ta frecuenta e reunionnan di Parlatino. Un parlamentario cu regularmente ta informa di su participacion na e tipo di reunion aki, ta parlamentario Endy Croes (MEP), kende recientemente a bay cu su colega di fraccion, Edgar Vrolijk (MEP) na Panama. Nan dos so a bay atende e reunion aki, pues no tabata un asistencia masal di parlamentarionan local. Esaki ta minimalisa e gasto cu parlamento mester cubri riba cada parlamentario cu ta biaha afo.

Encuanto si ta necesario pa parlamentarionan di Aruba sigui atende e reunion aki -considerando e situacion di crisis di finanzas publico- parlamentario Croes a responde cu Parlatino ta un escenario unda problemanan di cada pais ta wordo treci dilanti. Nan ta evalua nan y traha un ley macro. Nan ta ley cu despues ta wordo adapta y uza den cada pais. El a trece como ehempel e ley riba prohibicion di saco di plastic cu fraccion di AVP a bin cu ne, durante e temporada cu nan tabata mayoria den parlamento. E ley aki tabatin su origen na Parlatino, segun parlamentario Croes.

Gastonan
Encuanto si e ta resulta costoso pa atende e tipo di reunion aki, parlamentario Croes a declara cu generalmente esaki ta tuma luga na Panama, unda e organisacion aki tin su sede oficial.

Tambe e ta haya cu Panama ta keda relativamente cerca di nos isla. Un pasashi ta cerca di 1000 florin, y nan ta keda mas of menos dos dia den un hotel so. “E no ta di e costo ey,” el a declara.

E parlamentario tabata habri pa trata e topico aki. El a bisa cu cada parlamentario ta haya 350 dollar pa dia pa cubri nan gastonan di estadia, incluyendo hotel, cuminda y transporte. Apart nan ta haya e pago di nan ticket aereo. Generalmente e ta custumbra di biaha den clase economico, aunke nan tin derecho pa biaha den business class. Pero el a scoge como ser humano pa bay den clase economico.

E ta calcula cu e gasto di nan ta algo minimo, den comparacion di locual nan por haya na conocemento na bienestar di nos pais. E ta haya cu un pais chikito manera Aruba masha poco experto nos por tin di loke nos por pense. E ta papia esaki a base di su propio experiencia tempo cu e tabata den mundo di loteria, unda e tabata atende congresonan pa bin cu ‘ideanan bunita.’

E ta kere cu si nos parlamentarionan ta bay Parlatino pa acudi na e reunion, aporta y bin bek cu informacion y aplica na Aruba, e ta di vital importancia pa sigui atende e tipo di reunion aki. El a referi cu te hasta via Parlatino y Euro Lat, presidente di parlamento actual a logra cierto acuerdo den e parlamento Europeo pa atende financieramente cu e refugiadonan di Venezuela. Algo cu inicialmente Hulanda mes a nenga nos.

“Mi kier ta hopi transparente cu pueblo, pasobra e placa aki no ta sali di mi saco”, e di. P’esey cada biaha cu e ta biaha cu placa presupuesta di parlamento, e ta duna un relato con e reunion afo a bay. Generalmente parlamentario Croes ta gusta atende reunionnan internacional tocante deporte, segun e ta splica.