Ayera mainta parlamentario y ex minister Endy Croes a publica a traves di su pagina di Facebook oficial un publicacion cuestionando con presidente di Raad van Advies (RvA), Sr. David Kock, por realisa screening di parlamentario y formador Mike Eman, siendo cu e ta su padrino di bruid.

Den su publicacion Croes ta indica cu el a manda un carta tanto pa Raad van Advies como pa Gobernador di Aruba, SE Alfonso Boekhoudt pa trece dilanti e situacion cu segun e parlamentario ta hopi preocupante.

Pa loke ta trata kico en realidad e carta ta encera, Croes a splica cu dia 6 di maart ultimo, na durante e tratamento di presupuesto di Raad van Advies (RvA) pa aña 2025, su persona a hiba palabra y den su comunicado a haci cierto pregunta relaciona na e situacion aki.

Parlamentario Croes a puntra si ta normal cu un padrino di bruid di Mike Eman referiendo den e caso aki na e presidente actual di RvA, David Kock, ta esun cu mester investiga y screen Mike Eman como posibel candidato pa bira minister den e proximo gobierno.

E ex-minister a mustra su preocupacion grandi pa e situacion aki teniendo na cuenta cu tin un keho oficial entrega na Ministerio Publico (OM) dia 3 di juni 2020 contra Sr. Eman. Segun parlamentario Croes, Eman a ricibi varios transferencia di 50 mil dollar pa su campaña for di un Roberto Rincon, ken segun el a sigui splica, a cay cera na Merca pa corupcion y estafa di mas di mil miyon dollar.

Parlamentario Croes ta cuestiona den su publicacion si Sr. Kock, e padrino di bruid di Mike Eman, ta na altura di esaki y si ta moralmente corecto cu e ta screen Eman, teniendo na cuenta e relacion cu nan tin.

“Esaki ta conflicto di interes y kier pa tur instancianan respeta na Aruba ta na altura kico ta pasando. Si tin un schijn di conflicto caba bo mester hala un banda y laga un otro hende haci esaki. Den cuadro di esaki Parlamentario Endy Croes a manda un carta pa Raad van Advies cu copia pa Gobernador,” el a indica.

E carta aki, e actual parlamentario y ex minister a entreg’e na RvA como tambe cerca Gobernador di Aruba. Adicionalmente hunto cu e carta aki el a agrega tambe un copia di e aangifte, e keho oficial, cu a ser entrega na Ministerio Publico contra Mike Eman data 3 di juni 2020 hunto cu supuesto prueba cu Eman a ricibi e transferencianan di 50 mil dollar, “placa preto” segun parlamentario Croes, pa su campaña.

Ademas el a agrega e prueba oficial cu Ministerio Publico a stempel cu a ricibi e keho entrega 3 di juni 2020.

“Pues esaki ta prueba cu Ministerio Publico tin e keho aki y aparentemente a scoge pa no pasa e informacion y/of actua ainda. Parlamentario Endy Croes ta keda preocupa cu e situacion aki comokiera cu Ley ta conta pa tur hende desde e homber chikito te na grandi “pero al parecer Mike Eman ta ‘getaway’ cu tipo di cosnan asina,” el a subraya.

Por ultimo e parlamentario a indica cu e tin confiansa ainda den e sistema di pais Aruba y lo keda percura pa tur esnan envolvi den screening ta na altura pa asina pueblo por tin e confiansa cu e Landsverordening Integriteits Ministers (Ley screening di minister) por ser realisa na e manera corecto y ta conta pa tur hende, incluyendo Sr. Eman.

Bon Dia Aruba a tuma contacto cu parlamentario Eman pa puntra si tin un comentario, reaccion of aclaracion riba e informacion publica pa parlamentario Croes, pero te na momento di ciere di nos edicion no a ricibi contesta riba nos preguntanan.