Parlamentario Endy Croes ta premira cu aña 2021 lo resulta den un aña positivo y alentador pa Aruba. Aruba lo drenta e proceso di recuperacion “post covid” mas lihe cu a anticipa na inicio. Den e transicion aki locual ta hunga un rol importantisimo pa Aruba ta e hecho cu RDA logra cera un contracto tanto cu Quanten LLC Consortion y tambe un contracto cu Eagle LNG. Ta trata di dos diferente proyecto y pues dos diferente contracto. Contracto cu Eagle LNG ta mustra un contracto cu RDA por cristalisa mucho mas lihe kisas prome cu fin di Februari 2021. Pa locual ta trata e contracto cu Quanten LLC Consortion lo tuma mucho mas tempo como cu ta trata di un contracto mucho mas complica y ta anticipa cu pa final di maart of den luna di April por tin claridad final riba esaki. Ohala cu RDA por yega na entendimento cu ambos Companianan Americano y finalmente firma contracto cu tur dos empresanan multimiyonario. E procesonan aki ta den pleno ehecucion y Team Aruba ta den pleno negociacion cu ambos partido. Cu Papa Dios guia e Team y Aruba pa hunto nos crea pilarnan nobo economico banda di turismo.
Kico ta e beneficionan pa Aruba trahando cu Eagle LNG :
E proyecto aki ta encera cu Eagle LNG lo transporta LNG ( Liquefied Natural Gas)for di Merca y trece esaki den un barco den forma di likido y lo descarga esaki den tankinan special cu lo mester wordo construi na Aruba. Alabes lo construi un planta di un inversion di alrededor 185 miyon us dollar cual inversion Eagle LNG tin cla y ta ready to go di acuerdo cu informacionnan extra oficial di entre otro di Consul Americano. US Department of Energy y Secretary of Energy tambe a confirma e sosten di Gobierno Americano pa cu e proyecto.
E planta aki lo procesa e LNG ( Gas Natural den forma di liquido) y lo converti esaki bek den natural gas. Gas Natural comprimi y fria na un temperatura di -160 grado C ta bira liquido y pues ( LNG) y den e proceso aki e volumen ta shrink aproximadamente 600 biaha. Pues pa mas claridad un barco di gas comprimi y fria den forma Liquido ( LNG) na -160 grado Celsius ta mescos cu 600 barco di Gas Natural. Beneficionan directo cu esaki lo tin pa Aruba ta entre otro cu refineria lo opera riba gas cual lo haci e menos costoso y mucho mas limpi.
Un otro beneficio ta cu Eagle LNG lo exporta LNG den region creando un producto di export cual lo trece divisas pa Aruba. Un otro beneficio ta cu momento cu logra converti WEB pa bay over riba gas y di acuerdo cu WEB su inversionnan cuantioso haci 2 aña pasa den motornan Wartsila Recip Engines cual motornan ta prepara pa core riba gas esaki lo haci e produccion di WEB al respecto awa y corienta mucho mas barata y limpi. Ademas lo elimina por completo e problematica di sulfur cu tin actualmente pa cu WAF na Barcadera y alabes lo logra di berdad baha prijs di awa y coriente considerablemente.
Un beneficio extra ta pa Eagle LNG traha na Aruba su Gas Bunker Station pa barconan cu geograficamente ta pasa den awanan cerca di Aruba unda nan por “tank gas” aki na Aruba. Barconan ta transformando rapidamente di HFO/ Diesel pa core riba gas cu ta mucho mas barata , stabiel y limpi. No mester lubida tur “Cruise shipsnan” cu tambe lo transforma pa core riba gas den futuro hopi cercano. Terminando Parlamentario Croes ta enfatisa cu negociacionnan ta andando y cu Fe y Speransa prome kwartaal di 2021 lo cera cu noticianan positivo pa henter nos comunidad.
