Parlamentario Endy Croes (MEP): ‘Nos ta respeta tur manifestante, pero e caranan manera Andosito Croes, Norman Roos, Luanne Eman ta dun’e un toke hopi politico’

Parlamentario Endy Croes a analisa siman cu a caba di pasa. Parlamentario Croes ta inicia na bisa cu tur pero tur conciudadano riba e pais aki tin nan pleno derecho democratico pa manifesta cualkier discontento of inkietud. Parlamentario Endy Croes ta sigui bisa cu un manifiesto por ta pa un discontento di un of mas conciudadano pero hopi biaha nos conoce tambe manifestacionnan  politico.

Segun Croes, cu tur respet pa nos maestro y maestranan di school, por a tuma nota cu e manifestacion di diabierna ultimo tabata tin un tinte politico bastante berde. No obstante cu a tuma nota di diferente manifestante cu den luna di april tabata den e manifestacion di AVP cu Mike Eman dilanti cas di gobierno, awor a presenta cu e maestronan preocupa kendenan 100% no ta maestro tampoco maestra pero mas bien activistanan di AVP.

Sabor politico di manifestacion.
Parlamentario Endy Croes ta splica cu esaki no ta kita si cu nan tambe tin derecho di manifesta pero sigur esaki ta duna e ocasion actual un sabor hopi politico. Alabes a tuma nota di algun otro maestro y maestranan cu ta conoci cu ta activistanan di AVP. Ora mira Andosito Croes, ruman homber di Paul Croes kende a desgracia e baranca aki bendiendo mas di 2000 permiso of ora nos mira ruman di casa di Paul Croes, esta juffrouw Misha of ora mira prima di Mike Eman, juffrouw Luanne Eman  casa di Villasmil kende a cobra 700 mil florin bou di e gobierno anterior como coordinador di Mike, of ora mira ex Parlamentario di AVP Norman Roos kende tabata 8 aña ta ronca den parlamento y casi bo no sa mes cu e tabata t’ey, tur esakinan ta duna e manifestacion un sabor meramente politico. Kisas esaki ta di lamenta pa esunnan cu si tabata tin e manifestacion den nan curason pa expresa cualkier inkietud. Laga pueblo mes saca su conclusion riba esaki.

MEP ta habri pa scucha y yuda.
Parlamentario Endy Croes ta continua splicando cu ora tende gritonan di e maestronan aki dirigi na Presidente di Parlamento Ady Thijsen exigiendo pa yama un reunion awor pa baha minister Lampe nos mester puntra nos mes si como educador bo nunca a compronde e proceso den Parlamento of cu tur respet bo mester por sa miho? Boso ta compronde si cu asina Parlamento no ta funciona? Croes ta compronde cu por tin discontento pero no mester mescla color politico den boso lucha. Nos semper ta para habri pa scucha y pa yuda. Den 2018 nos a scucha hopi maestro kendenan tabata discontento cu un posibel  cambio proponi di DPS pa un Stichting y honrando e disgusto di maestronan cu a resona nan bos e tempo aya esey no a bay door. Den 2019 mi persona cu Edgard Vrolijk y Hendrik Tevreden a bishita schoolnan manera SPO Brasil momento cu tabata tin discontento y a scucha y intermedia y a yega na solucion. Traimerdia tambe tabata tin su dificultadnan y nos a bishita nan, scucha nan y esey a wordo regla faltando algun toke final. Muchanan special cu tabata bay MDC awor ta bayendo Dornasol y recientemente MDC a wordo aloca bou di Prome Minister. Ta mas cu logico y alabes husto cu Prome Minister Evelyn Wever Croes mester di tempo pa por organisa esaki. Alabes Lampe como Minister mester por tin espacio pa hiba su vision.

Situacion financiero dificil.
Gobierno aki a ricibi un Aruba den ‘coma’ financieramente manera cu Mike Eman a lag’e. Bon pa maestronan tuma tempo y lesa e protocol unda Hulanda tin hancra cu e desaster cu Mike a laga atras  y siguiendo e rumbo financiero nobo y sostenibel na 2039, pues aki 20 aña lo logra baha e debe di 93% (AVP) pa 50% unda MEP a lag’e na 2009. Tristo no? Esaki ta husto? Mira boso yiunan den nan cara y puntra boso mes si ta Mike Eman mester bin bek pa caba di sink e luga aki?  Nos lo kier un gobierno di AVP bin drecha locual nan mes a destrui? Na interes so Aruba ta paga e aña aki 232 miyon florin di cual nos a paga 118 miyon caba den e prome mita aña. E fantasia di proyectonan PPP cu AVP a firma sin calcula of presupuesta con pa paga nan, e aña aki nos gobierno mester cuminsa paga 80.9 miyon pa 20 aña largo. Gastonan di personal di gobierno den 2018 tabata 485 miyon y di acuerdo cu e protocol e no por surpasa 479 miyon den 2019 y pues a baha esaki cu 6 miyon e aña aki.  Asina tin masha masha hopi ehempel mas pa splica e situacion dificil.

Amor ta bin di dos banda.
Parlamentario Croes  tin masha hopi aprecio pa e trabou di maestronan pero nos mester ta sincero tambe cu den 1 aña y 9 luna ningun hende na e mundo aki por resolve e desaster grandi aki cu Coalicion a encontra y p’esey ta pidi pasenshi y tempo.  Dialoga ta e caminda pa cana pa nos por sali for di cualkier impasse. Den bida amor ta bin di dos banda. Mescos ta resolviendo diferente inkietud cu diferente otro instancia y/of departamento lo percura pa resolve e dolor di maestronan tambe den tempo super dificil cu masha tiki espacio pa por traha. Parlamentario Endy Croes ta termina bisando cu tin bunita plannan pa 2020 y desde 2020 en adelante momento cuminsa logra esakinan Aruba lo cuminsa respira un aire fresco atrobe y hunto nos lo cuminsa sinti e prosperidad.