Parlamentario Endy Croes (MEP): Najaarsnota a drenta Parlamento y ta mustra bon ‘Pronto lo tin un Bijeenkomst cu Minister di Finansas pa duna splicacion’

Parlamentario Endy Croes ta convenci cu Gobierno actual maniobrando todo por todo pa rescata Aruba for di un desaster cu a wordo hereda y ta logrando esaki. Den e curso pa pone Aruba bek riba rails corecto ta tuma no solamente tempo pero inteligencia, curashi y boluntad.

E tres ultimo aspectonan aki e gobierno anterior no tabata tin. Tanto Minister Presidente Evelyn Wever-Croes como Minister di Finanzas Xiomara Ruiz-Maduro cu nan curason na e luga corecto y hunto cu nan team a traha un plan consistiendo di un ‘modelo’ corecto pa asina saca e pida baranca aki for di un abismo y scapa Aruba pa no bati bancarota.

E magnitud di e desaster.
Curashi ta un palabra cu no ta tur hende tin y sigur no e gobierno anterior. Pueblo di Aruba awor tin comprension pa e situacion y ta compronde miho e Mega Debe cu AVP a crea pero alabes pueblo ta carga e speransa cu e Coalicion aki lo corigi e situacion bastante rapido. Realidad di bida sinembargo ta diferente. E magnitud di e desaster cu Mike Eman a laga atras no ta algo simpel y ta rekeri un atencion hopi profundo. No ta por nada Eman a grita den Parlamento cu e ta orguyoso di e debe y e debe t’ey pa pueblo bay pag’e den futuro. CAFT y Hulanda a confirma na januari 2018 – net 1 luna y mey despues cu Eman a bay cas – cu e debe ta astronomico y cu cada baby cu nace awe tin un debe riba su cabes di 40 mil florin. Tambe a wordo reconfirma cu Eman y AVP a presta den 8 aña un suma di 2.2 Biyon florin.

Na 2020 lo no presta mas.
Tambe den e protocol cu Hulanda a firma na november 2018 tin ancra cu si sigui e rumbo corecto cu e gobierno actual a scoge, e debe nacional lo baha y alcansa 70% na 2027 y 50% na 2039. Pues aki 20 aña e ta yega bek unda MEP a lag’e na 2009. Tristo no? Esaki ta e tristo realidad di e desaster di Eman. Eman tabata presta entre 300 y 400 miyon pa aña pa cera su begroting. E aña aki e gobierno actual tin un deficit di 25 miyon y otro aña no lo presta mas, sino lo bay tin un surplus di 25 miyon. Den e Najaarsnota actual por a compronde cu e 25 miyon programa pa cera begroting tambe ta mustrando miho y tin e chens grandi cu final di aña esaki lo ta solamente 4 miyon. Esaki ta e señalnan di un bon disciplina combina cu un maneho corecto y profesional.

E siman aki Parlamento lo yama e Minister di Finanzas den un Bijeenkomst pa e bin duna splicacion riba e halfsjaars nota. Aruba ta den bon man y Aruba ta riba e bon caminda. Nunca pero nunca mas por permiti AVP pa bin bek.