Parlamentario Endy Croes por a scucha algun periodista liga na AVP y Mike Eman durante ultimo siman ta yora tur merdia na canal 90 riba diferente politiconan di MEP y alaves contra Lider di MEP. Kico ta e dolor literal di e duo aki? E dolor en realidad ta PODER y PLAKA y nada mas. E gobierno aki a cera e cranchi di e duo abusado aki di pueblo kendenan tabata tin contract cu TUR ministernan di AVP.

Al aparece ta nan so tabata tin mag di biba durante 8 añanan di AVP. E duo aki a lanta tur sorto di compania di mercadeo pa asina defende e Gobierno di Mike Eman cu lo bay den historia como e gobierno di mas malo, mas corupto y mas ladron. Ta via e gobierno ey di AVP e duo aki a cobra mas di 7 miyon florin. Salarionan di averahe na 75 mil florin pa luna. Pues nan tabata cobra mas hopi cu directornan di tur compania rond di Aruba. Awor cu no a logra sucumbi Ministernan actual pa sigui paga sumanan astronomico nan a bolter 360 grado contra un gobierno legitimo y lo usa nan media nan comprometi pa trata na influencia pueblo tur dia cu mentira pa asina purba yega bek na PODER y PLAKA.

E cabayero aki tabata tin un Ford Explorer di 200 mil florin:

Por a lesa den media recien con e cabayero doño di e medianan aki tabata core un Ford Explorer Limited Edition ful manda na un balor di alrededor 200 mil florin. Awor cu gobierno a cambia e auto aki aparentemente a wordo kita for di dje como cu e ta un mal cumplido. E ta conoci cu e no ta cumpli cu su debernan aunke cu e tabata strica 75 mil florin pa luna for di gobierno. Mester accentua cu banda di esaki tanto den Utilities, AAA y RDA el a strica sumanan miyonario.

No obstante esaki ta conoci tambe cu e cabayero aki tin un mal bicio na weganan di placa. Entre otro e ta gamble masha hopi den casino. Esaki por ta un di e rasonnan kisas cu e no ta gusta cumpli y cada bes ta cay den problema y ta den cora. Esaki kisas tambe ta e urgencia cu awor cu dam ta secando e mester haci extra esfuerso pa crea un imagen malo di e gobierno actual pa e por tin chens di bin bek y sigui chica pueblo. Ta bon pa pueblo ta na altura di esunnan cu pa hopi aña tabata hiba bida di luho y no tabata ni papia na radio awor t’ey bek y por algo cera!

Show cu tasnan di Louis Vitton na balor di 2000 us dollar a caba

A crea tur sorto di structura pa chica e baca cu yama Aruba. Asina e casa tambe a lanta compania di mercadeo y a haya un cantidad di contract cu gobierno. Te hasta cerca Dowers cu ta plee Santo y nunca a kibra un copi. Compania aki tambe a suta su 2 miyon florin. Pues esaki tabata crea espacio pa casa por “show off” cu tasnan di marca. Manera tasnan di Luis Vuitton di 2000 US Dollar pa un, alaves tasnan y armband marca Prada y Gucci. Segun fuente desde 2018 hendenan a mira e casa cu e mesun tasnan caro y no a cambia nan tur luna mas manera antes. Pues esaki por ta indicacion cu cos no ta canta macamba y mes dushi cu antes mas.

Awe lo publica un di e contractnan di e sinberguensanan aki:

Hecho tras di esaki ta pa pueblo compronde nan yoramento na radio y den media ultimo siman. Awe lo publica un di e tantisimo contractnan cu e grupo aki a cera. Esaki ta uno cu x minister Scwhengle firma 10 di Augustus 2017 (1) luna prome cu eleccion na balor di 8 mil pa luna. Den e contract nan ta splica cu e ta pa 9 luna met terug werkendekracht desde 1 di Januari 2017. E contract na inicio ta splica cu ta un contract entre Tera Group Advertising & Marketing N.V. cu Bureau Minister Schwengle. Anto na final di e documento e contract a wordo firma pa x Minister Schwengle y Paxi Public Affairs Communications N.V.

Pues asina hopi “geshoemel” tabata tuma luga den e gobierno anterior. Pues e pareha aki trahando den mesun computer na cas hasta tabata haci fout den cambiamento di nomber di compania y e x Minister en cuestion a firme tambe. Aruba berdad tabata boca abou.

Poco poco pero sigur ta aclara e grito di desesperacion di e duo aki cu sed pa PLAKA y PODER!