Parlamentario Endy Croes (MEP): Ministerio Publico “come in”; Benny Sevinger y caso Avestruz ta manera Zagen Zagen Wiede Wiede Wagen

Parlamentario Endy Croes ta sintiendo e preocupacion den pueblo siman tras di siman ta evolucionando birando dia pa dia mas grandi. Fin di siman a bolbe en contra cu ciudadanonan cu a perde nan confiansa total den Ministerio Publico. Esaki tin hopi di haber cu berdaderamente e palabra “corupcion” ta biba hopi halto den comunidad. Tanten cu nada no pasa no lo reestablece trankilidad den pueblo cu Ministerio Publico ta funciona.

Aparentemente e sentimento den pueblo ta biba cu Ministerio Publico sea no ta capaz of sea falta di “mankracht” y falta di experticio ta locual Bo ta scucha rond ora Bo bishita luganan publico. Hopi otro ta mescla politica den esaki y ta bisa cu Ministerio Publico su agenda ta wordo dirigi desde Den Haag pa proteha Mike y AVP. Otronan ta bisa cu nos rechtszekerheid ta na peliger.

Como Parlamentario nos ta haci nos maximo esfuerso pa calma pueblo tumando hopi tempo primordialmente den luganan publico pa asina splica cada ciudadano cu no ta trata di un trabou facil y cu e trabou aki ta tuma su tempo pa hiba un investigacion debido. Pues ban carga pasenshi paso e dia lo yega!Cada rato pueblo ta recorda casonan manera IBIS di Paul Croes, Avestruz di Benny Sevinger y Wasmachine di Mike Eman. Tur ta x ministernan di AVP di perdio de 2009-2017.

Caso Avestruz ta un di e casonan di mas grandi:

Keho oficial den e caso di Avestruz a wordo entrega desde Februari 2018. Un keho hopi elabora cu un cantidad di pruebanan palpable. Pruebanan con Benny Sevinger tabata coopera y facilita un clan di amigo for di su oficina pa haya optie riba terenonan comercial pa despues bende e shares di e N.V. cu companianan stranhero pa miyones unda automaticamente den e construccion aki e optie di e tereno comercial a bay cu e Shares nan di e NV cu a wordo bendi pa e doño nobo.

Asina amigonan di Benny y AVP a bira miyonario den tempo record. Berdad ta cu Ministerio Publico a tira un huis inval dia 1 di october 2019 na cas di Benny Sevinger y su amiga Leoncita pero tambe na un abogado na Corsou. E network aki ta uno masha grandi y ta papia di mas di 25 miyon florin a wordo “cash in” via banconan na Panama, Corsou, Miami, Colombia pa nombra algun. Awe lo publica un prueba di un documento cu Ministerio Publico tambe tin y ta trata di un benta di un solo tereno na balor di 3.5 miyon dollar di un otro x candidato di AVP kende tabata traha cu Benny den su kantoor.

Ta trata di 9000 m2 na Eagle beach pa Condominuim:

Solamente pa duna un prueba ( cual Ministerio Publico tambe tin) ta con e wega di djaca aki tabata bay. Benny semper ta firma “ dezerszijds akkoord gaarne uw medewerking”. Hopi biaha ta e mesun dia cu e documento yena pues ta duna tur indicacion cu e grupo rond di Benny ta nan mes ta fix tur cos. Ta imposibel cu nan ta logra haya firma di Benny asina lihe. P:or pensa cu na cas cerca Benny bou un “ borreltjie” nan tabata fix e cosnan aki. Klaramente ( mira attachment) ta trata di un tereno comercial cu a wordo bendi pa 3.55 MIYON US Dollar. Pues un solo tereno comercial. Den e documento aki por lesa cu 10% di e suma esta 355 mil US Dollar “ has already been paid by Buyer to Seller”.

Pues x candidato di AVP kende ta involucra den e benta aki a ricibi nan pago di 10%. E documento aki ta fecha 2 di Maart 2016 pues un aña prome cu eleccion y e cosnan aki tabata pasa rapido y na cantidad. Te hasta tin prueba di comision cu a wordo paga. Awe pueblo mes por lesa un di e caso nan y por tuma nota di e “Purchase Price and Payment” hinka den nan contract cu otro. Ta e cosnan aki ta preocupa pueblo. Pa nos no lubida cu 2 di maart 2016 momento e corupcionnan aki na gran escala tabata tumando luga Marisol Lopez Tromp tabata riba lista di AVP y tabata Presidente di Parlamento di AVP y nunca a lansa pregunta riba e corupcionnan aki. Just for the record. Parlamentario Croes ta termina pidiendo pueblo pasenshi paso Ministerio Publico lo ta canando su caminda pero e embergadura di e caso aki ta uno hasta pafo di Aruba tambe y kisas esey ta tuma mucho mas tempo cu normal. Nan dia lo yega!