Parlamentario Endy Croes a amplia tocante e conferencia di prensa extraordinario cu Mike Eman, tanto diadomingo como diahuebs siman pasa, tabata den contacto cu comunidad a traves di prensa.

Analisando e locura di Mike Eman, esaki ta keda uno inexplicabel. Eman dia 22 di september 2017, despues di eleccion unda AVP a bay atras cu mas di 10 mil voto, a declara cu e lo retira como lider di AVP. Pueblo a keda masha contento como cu nan a kere cu Eman lo tabata papia berdad pa prome biaha den su carera politico. Tambe Mike a splica cu AVP lo bay oposicion pasobra AVP sigur no lo traha cu POR. Eman a defrauda su 7000 y pico votadonan y a scoge conscientemente cu e no lo drenta Parlamento pa defende su votadonan. Mescos Visser y Schwengle, kendenan tambe a nenga nan puesto como Parlamentario, cual a habri caminda pa Jennifer Reyes, Michael Lampe y Marlon Sneek drenta di carambola.

Destabilidad mental.
Eman ta sinta warda por ehempel ki ora SEPPA ta lanta e maestronan di school y ey e kier purba show off. Of Mike ta sinta warda META CORP lanta su empleadonan pa manifesta y ey Eman kier tene na rabo di cualkier cos pa purba trece intrankilidad den un pais cu e mes a destrui. Colmo de los colmos, Mike a tira un poesia, cual el a nombra como discurso nacional sin ningun clase di autoridad. Momento cu Eman a ripara cu e no tabatin acogida, pasobra awor ya pueblo tin’e door en door como un manipulador cu un destabilidad mental, e kier a bolbe sali diahuebs siman pasa riba ley di LAFT. Ata Eman purbando di inculca den pueblo un ‘crisis constitucional’. Eman mes a firma e protocol di 2 mei 2015, cual a desemboca den ley di LAFT dia 27 di augustus 2015, unda pueblo a lanta pa defende autonomia cu Mike a entrega na e Hulandesnan y historia di esaki ta conoci. Awe Eman tin e pudor di papia riba LAFT? Eman ta e entreguista di mas grandi cu Aruba conoce banda di ta esun culpabel pa e desaster financiero.

Unda e vertrouwens regel di Mike a keda?.
Un Patatu a dal Eman diahuebs ultimo y Mike a cuminsa papia riba literatura y vertrouwens regel. Aki Eman kier splica ki ora un gobierno mester bay cas. Locual a straña masha hopi segun Croes, cu Eman a lubida masha lihe con el a sostene por ehempel un Paul Croes. Paul, kende tabata cera den KIA pa abusonan y negoshi miyonario cu permiso, a keda cobra salario di minister. Eman a percura pa regla esaki. Esakinan ta abusonan inperdonabel. Pueblo hamas por scoge pa coruptonan manera Eman y Benny Sevinger bini bek na mando di e pais aki.

Mike a pusha Marlon Sneek pa haci cambio den ley pa acomoda Paul. Unda e vertrouwens regel di Mike a keda pa cu esaki y pa cu integridad? Eman a destrui Aruba tanto socialmente y financieramente. Croes ta indica cu ki ora un of mas politico di AVP trece algo cu no ta cuadra, nan por anticipa cu e lo haya un reaccion pa pone cada un na nan luga. Un Sevinger cu a grita den Parlamento ‘I don’t give a damn’! Eman cu a grita den parlamento cu e ta orguyoso di e debe y e debe t’ey pa henter pueblo bay pag’e den futuro.

Pueblo, bo ta identifica bo mes cu un partido asina? Bo por identifica bo mes cu hendenan sin escrupulo di e magnitud aki? Croes ta termina bisando cu nunca pero nunca mas pueblo por confia pushi cu pisca, pues nunca mas confia Aruba den man di AVP.