Parlamentario Endy Croes desde inicio di November a splica den un conferencia di prensa cu e luna di November ta e luna cu Aruba por spera noticianan alentado. No solamente a pasa e proceso unda a yega na un acuerdo “temporal” cu Hulanda pa asina garantisa prestamo di 209 miyon florin na 0% di interes cual a fortifica y garantisa entre otro pagonan di Loonsubsidie pa 21000 empleadonan di sector priva cu ta dependiendo riba esaki pa cu lunanan di November y December pero alaves a trece trankilidad pa cu operacion di henter pais Aruba pa e mesun lunanan ariba menciona. Parlamentario Endy Croes a manda un carta recientemente pa gobierno cu e peticion pa inclui den presupuesto 2021 “minimo” 3 luna mas di Loon Subsidie, FASE y MKB pa cu aña 2021 y asina brinda comercio espacio pa recupera y hunto nos lanta e pais aki back.
Luz di speransa ta un inversion grandi den Refineria:
Banda di esaki e luz di speransa mes mes lo ta un inversionista poderoso cu placa limpi suficiente pa por inverti den e refineria di Aruba cual por percura pa hopi cupo di trabou y entrada pa gobierno structuralmente y pues lo refleha den recuperacion di nos economia cu un aporte cuantioso na GDP nos pais. Manera nos sa desde mei 2020 a inicia e proceso di un destaho publico cual a cana su caminda unda masha hopi interesado a mustra interes.
Esaki a sigui desaroya y awor ta den e parti final. E Advisory Committee cu ta atendiendo cu e proceso aki completamente independiente tin e tarea pa presenta na gobierno di Aruba su conseho final. Den cuadro di esaki gobierno na su turno siguiendo e consehonan lo nombra y determina ganado den henter e proceso aki pa asina sigui e proximo proceso cual ta negociacion di un contracto final. E biaha aki esaki mester ta un contracto beneficioso pa pais Aruba y no un contracto a la CITGO.
Di acuerdo cu informacionnan veredigno fin di e siman aki esta diabierna awor of mas tarda dialuna dicho comision lo entrega su conseho final na gobierno. Manera nos a anticipa desde inicio di November cu den luna di November ta bay tin noticianan positivo y alentado pa henter nos pueblo.
Parlamentario Endy Croes y Rocco Tjon a reuni cu Consul Americano:
Parlamentarionan Endy Croes y Rocco Tjon a reuni cu Consul Americano pa asuntonan economico Sr Olson den luna di October. Den un reunion bastante amplio por a compronde cu tin algun companianan Americano cu tambe ta den e proceso di destaho publico pa e Refineria kendenan tambe a pasa pa e ronda final.
Consul Americano Sr Olson a splica cu ambos compania cu ta den e “race” a wordo gescreen pa gobierno di USA cual ta un proceso normal y cu e screening a sali positivo. Kiko esaki ta significa? Momento companianan Americano pasa e proceso di screening na Merca ta garantisa cu dicho companianan tin e “back up” di Gobierno Americano.
E proceso aki na USA ta conoci como un proceso di “advocacy” momento gobierno Americano screen compania y inversionistanan Americano y ta confirma cu nan tin e placa pa inverti y cu ta trata di placa limpi unda gobierno Americano ta para tras di nan proyectonan y inversionnan. Esaki sigur ta un noticia hopi alentado.
Parlamentario Endy Croes ta termina bisando cu prome cu aña termina y muy probablemente e siman entrante lo bay tin noticianan hopi positivo cual lo cuminsa bolter e panorama negativo causa door di Covid 19 pa uno positivo drentando 2021.
Prome Minister di Aruba Evelyn Wever Croes y Gobierno actual no a haya un “easy ride”. A confronta masha hopi problema desde inicio pero cu e confiansa y perseverancia manteniendo un FE semper intacto ta lo bay logra cosnan grandi pa nos pais den 2021.
