Parlamentario Endy Croes mirando atras riba un aña 2020 hopi peculiar. Ta conoci cu Covid 19 a sacudi henter mundo na un forma devastador mientras Aruba a wordo afecta na un manera formal. Ta conoci cu Aruba su unico pilar economico ta turismo como tal e sla financiero tabata enorme. Sinembargo mester recorda pueblo tambe al respecto e afecto di e mal maneho financiero di Mike Eman y AVP Pre Covid.
Mike Eman a hipoteca Aruba na un manera cruel:
Mike Eman y AVP den 8 aña a desgracia Aruba hipotecando nos futuro generacionnan na un manera cruel. Mike Eman a presta 3500 miyon florin(3.5 Biyon) den 8 aña y asina a mas cu redobla e debe externo di Aruba. MEP a laga un debe nacional di 43% na 2009 despues di 23 aña di Status Aparte cumpliendo cu tur normanan internacional pero Mike Eman a haya ta bon pa redobla esaki na un manera sin gevoel alcansando 93% na 2017.
“ Sin palabra”. Bo no por ta stima e pueblo aki. Pueblo a paga 232 miyon solamente na interes durante aña 2019 riba placanan presta door di Mike Eman y AVP. Bo por imagina cuanto school nos por a traha y renoba cu 232 miyon? Tristo! Mike Eman a fiesta sin piedad creando deficitnan monstroso durante 8 aña largo y asina a crea e Mega Debe.
Hulanda a cay aden na 2014 pa purba “frena” y mara e mannan di Mike Eman. Banda di esaki pueblo mester paga 82.4 miyon na proyectonan PPP pa 20 aña largo. Na 2037 lo termina di paga esakinan. Danki Mike! No por exclui 142mil cu Mike a malgasta festehando su cumpleaños 1 di september 2017 riba e brug na spaanslagoen. Nos no por lubida e hedging cu a costa pueblo casi 300 miyon florin mas un sota di klop 1 di october 2014. Tur esakinan ta logronan di Mike Eman y AVP.
Mike Eman ta orguyoso di e debe:
Locual te awe ta incomprendibel ta e manera barata cu Mike Eman kier haci politica hungando cu e inteligencia di henter un comunidad. Despues di a destrui finanzas di pais Aruba Mike Eman a grita den Parlamento durante un reunion publico lo siguiente: “ Mi ta orguyoso di e debe y e debe t’ey pa nos tur bay page den futuro”. Que barbaridad. Mike Eman no tin ningun gevoel comun. Un hende asina por bay back riba un lista politico na 2021 y drenta Bo cas pa pidi Bo un voto di sosten? Kico Abo como ciudadano mes ta pensa? Bo por confia Mike Eman bek cu Aruba? Mike Eman a manda EMCO 3 biaha bancarota, Mike Eman a manda ATV canal 15 bancarota y Mike Eman a manda Aruba bancarota. Bo por confia pushi cu pisca? Banda di esaki awor ta conoci cu Mike Eman a ricibi varios transferencianan internacional entre otro 50 mil dollar di Roberto Rincon. Caso aki a wordo entrega na Ministerio Publico. Hallo Ministerio Publico conta pueblo algo di esaki! Terminando berdad nos ta den un aña critico door di Covid 19 pero si no tabata pa e desaster financiero cu Mike Eman y AVP a laga atras na november 2017 awe Aruba lo tabata mucho mas fuerte para pa sali mas lihe di e crisis aki. Prohibi pa lubida e astucia di Mike Eman, Friends , Family and Lovers!
