Parlamentario Endy Croes a tuma nota cu AVP den su desesperacion ta capaz di haci kico cu ta pa purba salba Benny Sevinger, nan candidato number 2. Pa straño cu e por ta zona, pa nan otro candidato, ex minister di AVP Paul Croes – kende tin un condena di mas di 4 aña di prizon riba su cabes pa bende mas di 2000 ontheffing y ‘hit’ hopi Chines comestibel – AVP no a sali asina fuerte na Paul su defensa.

Pues AVP a laga Paul Croes cay manera patia berde, pero despues di un siman di tabata ‘muisstil’ nan a strategia y a yega na e conclusion cu e miho manera ta pa baha y insulta Ministerio Publico, crea un esfera politico y di persecucion rond di e caso di Benny ‘Avestruz’ Sevinger y despues los e Donkey esta Melvin Tromp lag’e bay papia disparate. Asina AVP ta atende cu temanan delicado y serio di nos pais.

Monster corupcion di tereno.
No ta di awor rumornan fuerte tabata circula pero ta algun aña atras caba cu pruebanan tabata sali den diferente medio di prensa di e fiesta cu tabata tin rond di tereno. Manera PG saliente a declara na april ultimo cu IBIS tabata un caso grandi di corupcion pero tin un otro caso di corupcion andando cu ta mucho pero mucho mas grandi cu IBIS. Aparentemente esaki lo mester ta e caso Avestruz, esta e caso di tereno. Endy Croes ta bisa, duna tempo tempo y nos lo cera conoci cu e ‘monster’ corupcion di tereno. AVP no a laga su mal maña.

Kico Aruba a haci Mike Eman?
Pakico Eman a laga su ministernan abusa di e pueblo aki di tal indole? Mesun AVP ta e partido cu bou di Henny Eman a horca e pueblo aki cu e deal di Mafiosonan Italiano den e proyectonan di Hotel Beta, Ramada y Plantation Bay cual ruinanan ta dera bou di suela na Parke Jaburibari cual bou maneho di AVP a ser converti den un dump. Aruba a paga riba 200 miyon dollar di cual e ultimo pago a tuma luga na maart 2018. Tristo no? Mesun AVP tin un lider Tico Croes cu a wordo condena den un caso penal y cantidad di otro amigonan cu a cay cera den e caso di Fondo di Desaroyo Nobo San Nicolas, unda nan a somenta 50 miyon di pueblo. Mesun AVP a hedge WEB cual decision a costa pueblo riba 300 miyon florin. Mesun AVP a laga atras un suma di pago di interes anual di 232 miyon pa aña. Mesun AVP a castiga e pueblo cu proyectonan PPP unda Aruba mester paga desde e aña aki 80.9 miyon pa 20 aña largo. Asina nos por sigui. Endy Croes ta haci un suplica na pueblo pa nunca pero nunca mas pone bo confiansa den un partido corupto y Mafioso, AVP.

ndy Croes ta termina bisando cu Sevinger and friends mester bay duna cuenta awor na husticia den e caso Avestruz, unda pueblo lo haya sa exactamente kico tur a pasa y ohala cu afpak team por reclama patrimonio di pueblo bek momento cu ta asina leu.