AVP a vota contra presupuesto 2020 y awor ta yora cu ciudadanonan ta sufriendo?

Parlamentario Endy Croes ta cuestiona e forma cu AVP y Jennifer Reyes, kende por cierto casi nunca ta na pia di trabou,  ta hibando su politica. Durante su conferencia di prensa semanal e biaha aki dilanti Cas di partido AVP , cual cas ta manera un funeraria y ta bela so e falta, por a scucha Jennifer Reyes lesa for di un pida papel cu AVP ta prepara pe y asina ataca gobierno riba lo siguiente. Segun Jennifer Reyes cu ciudadanonan na Aruba ta sufriendo a consecuencianan drastico di un economia cu a bay plat desde maart 2020. Jennifer a continua bisando cu ya pa 4 luna mama y tata nan di famia ta sin entrada. Awe nos lo duna Jennifer les di su bida den politica y ora Bo kier hunga politica barata of lesa locual Bo partido a skirbi pa Bo sin busca mas informacion nos lo mester laga pueblo sa con mentiroso y manipulado Bo ta y kico tabata Bo actonan pa realmente yuda e pueblo aki.

 

AVP a vota contra presupuesto 2020 pa yuda mama y tatanan di famia:

Desde 13 di Maart Aruba a haya su prome caso di Corona Virus y mescos tur parti Mundo gobierno a cuminsa tuma medidanan pa salvaguardia salud di pueblo. Expertonan di Banco Central  a haci un calculacion extenso te cu fin di aña cual a resulta na un deficit di 1.2 Biyon florin mientras expertonan di Directie Economische Zaken van Handel en Industrie nan rapport a duna un deficit di 1.35 Biyon pa cu aña 2020.Pues di un surplus di 46 miyon cu gobierno tabata tin den su presupuesto e “golpi” economico di corona virus a bolter esaki pa un deficit gigantesco. Den esaki a tene cuenta cu alrededor di 37000 mama y tata di famia lo perde trabou y cu gobierno lo haya 627 miyon menos na entrada di belasting. Ora gobierno a bini cu hopi urgencia Parlamento ultimo siman di Maart pa trata e presupuesto ( Corona Virus) y a duna Parlamento tur rapportnan pa studia pidiendo Parlamento e cooperacion pa aproba e presupuesto di 1.3 Biyon cu nan a presenta pa asina  por tin placa pa “vang op” e 37000 mama y tatanan di famia cu lo perde trabou tanto AVP acompaña pa Jennifer Reyes a bay contra e presupuesto aki. E momento ey Jennifer  no a corda riba e mama y tatanan den problema. E momento ey Jennifer  no tabata interesa den e splicacion di Minister Presidente Evelyn Wever Croes kende a haci su plagaria pa AVP sostene e presupuesto. E momento ey politica barata tabata mas importante cu e ser humano  pa Jennifer Reyes . Awe Jennifer Reyes kier corda riba e famianan aki hungando un politica barata un bes mas.  E mes no a duna sosten den Parlamento momento e por a haci esey. No pero Jennifer a scoge pa bira lomba pa 37000 mama y tata di famia. Parlamentario Croes ta splica cu politica por ta bunita pero den momentonan di crisis Bo mester por sa cual banda Bo ta scoge. Parce cu Jennifer a lubida hopi lihe di su propio actuacion. Mi ta reta Jennifer Reyes pa reacciona riba esaki.

 

AVP a desgracia Aruba pa 8 aña cu apoyo di Jennifer Reyes:

Tin Parlamentarionan di “cashi glas” kendenan nunca a kibra un copi pero alaves nunca a aporta na un manera decente na pais Aruba. Jennifer Reyes pa 8 aña largo a grita voor y aproba tur fechoria y bagamunderianan di AVP. Si Jennifer a haci su trabou na drechi awe Aruba no tin un debe astronomico asina. Un total di 3600 miyon di debe den 8 aña di AVP. Awe ta paga 232 miyon na interes pa aña y 82.4 miyon na proyectonan PPP. Un total di 142 miyon na salario di coordinadornan den 8 aña mas un aumento di 81.3 miyon na gastonan di personal den 8 aña. Tur esakinan por a wordo evita si Jennifer a let op y haci su gobierno pregunta y exigi pa cambia e rumbo. Si no ta pa e desaster financiero y e Mega Debe cu AVP a crea awe nos no mester ta dependiente di Hulanda. Pues ora Jennifer Reyes papia cu e gobierno aki a laga mama y tatanan di famia na caya mi ta conseh’e pa bin trabou lesa su documentonan y “walk the talk”.