Parlamentario Endy Croes a splica cu diabierna ultimo, den oranan di mainta, su Abogado Anthony Ruiz a sorprend’e cu un yamada agradabel, cual a trece masha hopi alegria den henter famia.
Despues cu Croes a gana Ernst & Young na HOF dia 16 di januari 2018, unda HOF a duna un veredicto y a conclui cu Ernst & Young ta culpabel di a traha un rapport ilicito y falso cu yen di engaño contra Croes, Ernst & Young a bay Cassatie na Hulanda.
Den un veredicto di 23 pagina di HOF na 2018, unda 3 hues a bay hopi detaya riba e modus operandi di Ernst & Young contra Croes. Decision na Hulandes den e vonnis ey ta como lo siguiente: “verklaart voor recht dat Ernst & Young zich schuldig heeft gemaakt aan een onrechtmatige daad jegens Croes”.
Ernst & Young como un compania multi miyonario, mundialmente renombra como un di Big Four den mundo di accounting, a dicidi di bay Cassatie na Hulanda. Pues den 2018, aunke Croes tabata hopi activo den su trabounan sirbiendo su pueblo como parlamentario, mester a sigui lucha contra e ‘monster’ cu un determinacion sin igual, hunto cu su abogado Ruiz y team, mas un team na Hulanda.
Diabierna ultimo sinembargo, veredicto di Cassatie a drenta, unda 5 hues na Hulanda a confirma e decision di HOF, esta cu Ernst & Young a comete un onrechtmatige daad contra Croes. Casi 10 aña di lucha feroz y sacrificio sin igual awor a yega su final. E&Y no tin mas caminda legal pa cana, y porfin e berdad awe lo keda hancra den historia.
Croes no a bay den detaye, pero kier invita henter pueblo di Aruba pa sigui e conferencia di prensa awe mainta 11am, unda Abogado Anthony Ruiz lo amplia riba e sentencia di Hoge Raad. Tabata un caminda di cruz, pero cu pasenshi bo ta gana gloria. Penado no ta pena pa semper, Croes ta termina bisando.
