Parlamentario Endy Croes ta bastante indigna con Mike Eman awor ta purba colga na rabo di un profesor di Universidad di Aruba, Rycond Santos do Nascimento purbando di bende un plan diabolico, esta ‘Plan Aruba Holistico’.

Ambicion politico
Manera nos por a compronde cu e profesor aki tin un ambicion politico y pronto nos lo tende cu e lo wordo lansa riba lista di AVP. Su antoho ta pa bira lider, pero top di sponsornan di AVP no ta haya cu e tin e cualidadnan pa ta un lider, como cu e no por tira speech y esey ta un parti hopi debil di dje.

E no por logra manipula y gaña pueblo manera Mike si a haci. Pues esaki ta un exigencia di topnan di AVP cu un persona cu e deseo pa bira lider mester por manipula pueblo den bos halto pa e ta convincente. Tanto Richard Arends y awor Rycond ta cay cortico den e parti aki. Mientras tanto, ta keda en busca di un lider y lo mantene Mike mes durante e trayecto aki.

Pobresa
Pa sorpresa di bida, awor Mike Eman, guia pa Rycond Santos do Nascimento, a cuminsa papia di SDG’s.

Kico ta SDG’s? Sustainable Development Goals of Duurzame Ontwikkelings Doelen. Nacionnan Uni (UN) a desaroya cu participacion di mas di 70 pais un lista di 17 punto importante cu tur pais na mundo mester traha riba nan, pa haci mundo un miho mundo pa 2030. Number 1 y pues SDG # 1 ta ‘poverty’, pues combati pobresa. Net Mike Eman di AVP, awor yuda pa Rycond y pues e persona cu a hinca Aruba deep deep den pobresa, kier bin cu un Plan Holistico pa combati pobresa. Tin hende tin curashi den e mundo aki y tin otro no tin cuero di cara. Mike Eman no tin cuero di cara.

Mike Eman a ruina pais Aruba
Mike Eman a redobla e debe di e pais aki, unda na final di 2017 nos GDP a alcansa 93%. MEP a laga esaki na 43% na 2009. Es decir, di cada florin cu drenta caha di gobierno, 93 cen ta comprometi na debe. Gobierno e aña aki ta paga 232 miyon florin solamente na interes. Esaki ta e pobresa cu Mike a causa.

E aña aki pais Aruba mester paga adicional 80.9 miyon na Proyectonan PPP di Mike Eman y AVP. Banda di esaki, Mike Eman a regala su amigonan manera Patrick Paskel y Speed 6.5 miyon na propaganda, Abogado Sjiemfat 5.2 miyon na deskundig advies, Horizon Consultancy di Richard Arends 4 miyon, TNO y Phillips 10 miyon, Wubbo Ockles 2 Miyon, Coordinadornan den kantoor di ministernan 142 miyon den 8 aña; pa despues grita den Parlamento di Aruba cu e ta orguyoso di e debe y e debe t’ey pa nos tur bay pag’e den futuro. Otro declaracion di Mike: “Djis manda Aruba un tiki mas den rood”. Benny Sevinger ta sali tras di Mike y grita ‘I don’t give a damn’.

Un profesor manipulado
Con estupido profesor Rycond por ta? Ta ken e kier yuda? Cu su conocemento e kier yuda ‘brainwash’ pueblo pa pueblo lubida e desaster y Mega Debe orchestra pa Mike Eman y AVP y awor kier bende un ‘Plan Aruba Holistico’.

Mike a laga Aruba caba manera un HOL bashi esta un pais ingobernabel. Croes ta splica cu e ta sinti un berguensa inmenso pa tur esunnan cu ta haya les for di un profesor, cu poco poco ta birando un manipulado. Pueblo, ban keda alerta, pasobra nunca pero nunca mas por duna AVP un sosten pa locual nan a haci cu e pida baranca aki.