Parlamentario Endy Croes ta splica cu aña 2020 a resulta di ta un aña devastador pa Aruba causa door di e Covid 19. Sinembargo esaki no tabata pa Aruba solamente pero pa henter mundo y e impacto tabata pa uno mas fuerte cu e otro.
Eagle LNG cu e miho business model pa Caribe:
E compania Americano Eagle LNG kende a firma un LOI cu RDA/Gobierno recientemente ta un compania cu a diseña un modelo di negoshi pa Caribe cu ta haci cu nan prijs ta insuperabel. Pa cuminsa nan manera di transporta Liquid LNG den barconan “no” mucho grandi pero diseña pa rutanan den Caribe ta haci nan asina competitivo. Ban supone cu ta e barconan grandi cu ta bay por ehempel Europa of ASIA mester a pasa yena algun tanki cu Liquid LNG na Aruba lo haci e prijs mas caro como cu e volumen di Aruba no ta un volumen manera di paisnan grandi. Awor cu un business model enfoca pa region di Caribe cu barconan special pa e rutanan aki a bolter tur scenario ta haci e proyecto aki aun mucho mas atractivo.
Republica Dominicana, Jamaica y Puerto Rico a bay riba gas:
Paisnan manera Republica Dominicana, Jamaica (2 proyecto), y Puerto Rico ta entre otro paisnan den Caribe kendenan a “switch” pa LNG gas. Cada un depende di e proyecto a varia un poco den prijs pero tur a resulta den reduccion den operacion pa traha coriente cual a desemboca den un reduccion esencial pa henter nan comunidad den prijs di coriente y awa. Aruba tin den teblachi actualmente un oportunidad di “oro”.
Pa esaki gobierno mester duna instruccion contundente di su vision pa bay over na gas cual mester haya oido di esunnan encarga al instante. Entre otro WEB mester habri negociacion directo cu e compania di Eagle LNG y no por laga nada stroba esaki. Si Aruba kier forma parti di esaki na un manera exitoso awor ta e momento.
Consul USA ta para 100% tras di e proyecto aki y e compania Eagle LNG tin e fondonan necesario pa por desaroya e proyecto aki cual tin un costo di alrededor 185 miyon dollar. Finalmente importante ta cu prijs di LNG ta hopi stabiel y no ta fluctua manera HFO of Diesel, LNG ta un feed hopi limpi y asina WEB lo baha su emision di CO2 den aire kitando e problematica cu tin cu e Waf na Barcaders, alaves number tres WEB lo sa di baha prijs di awa y coriente cu minimo 20% pa henter comunidad.
Parlamentario Endy Croes ta spera cu inteligencia lo prevalece y nos amor patria por guia tur esunnan encarga pa cuminsa cu negociacionnan al instante pa e bienestar general. Nos lo bay sigui esaki hopi di cerca.
