Parlamentario Endy Croes (MEP): Drentando ultimo dianan di aña 2020 Un aña cu lo keda graba den Historia y un Prome Minister cu a cuida su Pueblo como debe ser

Parlamentario Endy Croes a splica cu nos a drenta e ultimo siman y ultimo dianan pa cu aña 2020. Berdaderamente un aña particular. Un aña cu nunca ningun experto na mundo a anticipa di locual e Covid 19 por a significa pa henter mundo. Un aña cu Covid 19 a paralisa economia mundial y Aruba cu ta depende practicamente di turismo a sufri mas cu hopi otro pais. Un aña cu gobierno di Aruba como Team lidera pa nos Prome Minister Evelyn Wever Croes mester a lora manga di camisa pa atende un Crisis Mundial hamas bisto.

Pa sostene pueblo trahado a bin cu Loon Subsidie:

Den e pandemia aki Aruba su unico pilar economico a sufri un impacto nunca bisto. Hotelnan mester a cera nan portanan y airport a cera pa tur vuelo unda consecuentemente den e cadena di turismo y tur mercadonan economico cu ta conecta na turismo alrededor di 37000 persona a hera keda sin trabou.

Gobierno a cuminsa inverti den e ser humano pa e por mantene nan na trabou y cu un entrada y asina a cuminsa duna tur doñonan di companianan un sosten den forma di loonsubsidie. Te cu november un total di 21000 empleado ainda ta cobrando nan salaris mediante e placa cu gobierno ta subsidia entre otro companianan priva. Esaki sigur a brinda un ayudo enorme. Banda di esaki gobierno a duna companianan Afl.4000 florin pa cada kwartaal pa por a paga entre otro huur y utilidad.

Pa esunnan cu a perde trabou por completo door di Covid 19 gobierno a introduci FASE unda nan por a cobra Afl. 950 pa luna y esunnan cu ta cay bou ZZP tambe a ricibi un sosten. All by all mas di 250 miyon florin inverti den e pueblo trahado pa mantene nos economia lorando y nos hendenan trahando.

Minister President a maneha e crisis aki formidabel:

No obstante cu tin un Crisis Team y cu Hulanda medienate RIVM ta brinda nos ayudo cu conseho, ta keda na Aruba pa tuma e decisionnan final. Den tur esaki Minister Presidente di Aruba Evelyn Wever Croes den combinacion cu Minister di Salud Dangui Oduber a haci un trabou sublime. Minister Presidente a tuma decisionnan corecto unda awe nos ta mira su frutanan.

A logra habri bek pa turismo poco poco pero sigur cu protocolnan cu por garantisa e siguridad di nos comunidad. Ta keda awor na Aruba pa desplega su disciplina pa hunto nos por vence e Covid 19 aki. Aruba no por supera un otro total lock down y pa evita esaki tur dia Prome Minister ta haci e suplica na cada con ciudadano pa nan demostra e disciplina total pa hunto nos logra esaki.

Disciplina pa cu e protocolnan estableci ta e caminda pa e victoria. Parlamentario Endy Croes ta termina suplicando pueblo pa ban uni hunto den e lucha aki pa nos por supera e virus aki esta Covid 19. Terminando nos ta sigur cu aña 2021 lo bay ta un aña mucho mas miho cu 2021.