Parlamentario Endy Croes (MEP): Carta a sali pa Conseho di Ministers: Pidi WEB pa no cobra “Late Fee” y reduci prijs di reconexion di 50 florin pa 25 florin

Parlamentario Endy Croes a amplia riba e prome dialuna di aña 2021 durante e prome conferencia di prensa di aña haciendo peticion special na WEB. Parlamentario Endy Croes a presenta un carta cual a wordo traha den weekend y lo sali dialuna pa Prome Minister Evelyn Wever Croes pa wordo trata den Conseho di Ministers. Peticion cu Parlamentario Croes a prepara den nomber di Fraccion di MEP cual ta carga sosten di henter e Fraccion ta lo siguiente.

Peticion pa WEB no cobra e late fee di 10 florin:

Manera ta conoci WEB ta cobra na clientenan cu paga laat un “late fee charge” di Afl.10,-. Durante e Pandemia desde April WEB a coopera te cu December 2020 y no a cobra e suma aki. Sigur un gesto di aprecia como cu pueblo den totalidad a pasa hopi den duro y tur ayudo pa con chikito cu e por ta lo contribui na un manera POSITIVO. Parlamentario Endy Croes a splica tambe cu den e carta cu a sali pa Prome Minister y Conseho di Ministers e peticion ta pa WEB exhonera pueblo durante henter aña 2021 di e late fee di 10 florin aki.

Peticion pa WEB reduci prijs di reconexion di meter:

Parlamentario Endy Croes a splica cu a pidi Conseho di Minister tambe pa considera y honra e peticion cu Fraccion di MEP pa reduci e prijs di reconexion di meters mei mei den e Pandemia y pa futuro. Argumentonan di Fraccion di MEP ta valido. Temponan atras WEB tabata kita un meter por completo y bay cune. Momento un ciudadano paga bek mester paga adicional 50 florin pa WEB bay arma e meter bek pa reconecta esaki. Desde basta tempo WEB a bay over na un sistema mas moderno unda WEB ta pone un tipo di “lock” of candal na Bo meter y ora Bo paga e 50 florin WEB ta solamente kita e candal. Pues realisticamente trabou pa esaki ta mucho menos intenso y ta costa masha tiki tempo y of placa di operacion. Pa e motibonan aki ta pidi WEB traves di un carta pa Conseho di Ministers pa duna instruccion na Board pa atende e reduccion di e 50 florin aki y baha esaki pa 25 florin pa reconexion. Fraccion di MEP ta keda pendiente pa esaki wordo trata y tambe ta keda pendiente pa e cooperacion di WEB den henter e proceso aki. Tur pa Un y Un pa Tur pa hunto nos logra sali di e crisis aki.