Parlamentario Endy Croes por a tuma nota di un conferencia di prensa cu partido AVP a yama ayera tardi pa duna informacion riba e ultimo desaroyonan al respecto e investigacion “monstroso” cu ta andando riba e caso Avestruz di cual x minister di AVP Benny Sevinger amigo intimo di Mike Eman ta e sospechoso principal.
Segun Benny y Mike esaki ta trata di un persecucion politico:
Tanto Mike Eman y Benny Sevinger a acusa Ministerio Publico cu ta trata di un persicusion politico. Segun Benny ta un x agente policial Rocco Tjon, Endy Croes y Edgard Vrolijk a entrega un keho y a pone precion riba Ministerio Publico pa inicia un investigacion. Mester corigi Benny mesora. Un Parlamentario mescos cualkier cuidadano por entrega un keho y ta 4 diferente keho a wordo entrega contra Bo persona pa mu e mesun caso. Nos conose e caso hopi bon y berdad a mira hopi documento y no ta manera pa corumpi un systema pa hasi al;gun hende rico purbando di by-pass nos leynan den un modelo y structura crea pa horta un pais. Bo a grita hopi biaha el que no debe no teme. Pues sinta bo trankil y bay conta landsrecherche dicon Bo tabata firma “TUR” peticion “akkoord” anto riba mesun dia of den menos cu un siman? Bo tabata malusa e peso di bo poder como minister pa influencia y coopera cu amigonan serca di Bo. Tin cu Bo a firma y Bo mes a pone fecha cu no ta klop atall, pues promer cu e fecha cu e peticion te hasta a wordo traha. Dieptriest! Awe bo kier ple inocente? Pueblo tin derecho di sa kiko y con e “triki” pa bende tereno y bira miyonario tabata funciona y ken ta tur esnan cu a forma parti di e fiesta of banda criminal aki.
Benny a manda carta Ministerio Publico:
Benny a presenta cu un carta cu su abogado a manda ministerio publico puntrando pa un update di e caso paso e mester bay elecion. Ta kiko a pasa den Benny su cabes? Bo no ta compronde cu Bo ta e sospechoso mayor y den ful e proceso Bo tambe lo wordo busca pa wordo interoga? Benny despues a ricibi un contesta di Ministerio Publico y ayera ta splica cu segun Benny e por conclui cu si e kier bay elecion e por bay elecion. E carta tabata skirbi si na Hulandes y nos tambe a lesa e carta ey y nos ta conclui diferente. Benny a acusa tur hende, tanto Ministerio Publico, Landsrecherche, Parlamentarionan, otro instancianan cu tambe a entrega keho pues tur hende ta fout menos Benny y AVP. Esaki ta tipica un dicho na Hulandes “ kat in de nauw maakt rare sprongen”. Como cu ayera tardi nan a detene amiga intimo di benny y Mike alaves defensor di AVP Leoncita Arends doño di Canal 90 kende tambe ta sospechoso den e caso aki, AVP a core sali cu un conferencia di pueblo pa hunga cu emocion anticipando cu e dianan di Benny ta asercando. Dia cu e caso aki yega mesa berde pueblo lo bay lesa y compronde e magnitud di e caso aki y con AVP a permiti su mes pa “horta” pais Aruba di e forma sin escrupulo aki.
Benny kier tira riba Hendrik:
Benny den su desesperacion a tira den direcion di Hendrik Croes un abogado di mas di 50 aña di experencia. A insinua cu Promer Minister lo a duna su tata trabou pa kita directeurnan di RDA, Elmar y Utilities. Nos como Parlamentario ya a revisa y check tur e acusacion falsonan aki di AVP desde cu Melvin Donkey Tromp a entrega cierto kehonan alrespecto. Ningun pero atrobe ningun caminda no tin y no ta existi un documento firma pa Promer Minister cu un of otro contract of trabou otorga na su tata. Benny a yora cu Promer Minister a kita Directuer di RDA. Mentira paso Directeur mes a entrega su retiro. Directeur di Elmar y Utilities ta dicho companianan ( NV) a contracta servicio di abogado y esey ta keda na nan descricion. Pues purba tira culpa falso riba Promer Minister pa tapa Bo propio fechorianan e flie aki no ta subi. Mes duro Bo a grita den Parlamento despues di masacra Aruba I dont give a damn, Bo por grita mesun duro den sala di Landsrecherche ora e momento yega. Nunca pero nunca mas AVP.
