ORANJESTAD – Parlamentario Endy Croes ta keda para ariba cu Henk Kamp mester tuma honor na su mes y entrega su retiro. Manera Croes a bin ta splica desde december 2018, cu Henk Kamp a wordo nombra como miembro di CAFT contra ley di LAFT.

Den ley di LAFT articulo 4 lid d ta stipula claramente cu un politico of ex politico no por fomra parti di CAFT. A pesar di e ley aki, Hulanda den mayoria, cu 14 representante den Rijksministerraad contra 3 gevolgmachtig minister cu ta den minoria, a bulldoze e ley y nombra Henk Kamp, un politico di partido VVD, esta e partido di Rutte.

Croes ta sigui bisa desde awor en adelante, tur rapport di CAFT cu drenta parlamento, e lo percura pa kibra nan publicamente den reunionnan publico, unda henter mundo por mira como cu su persona no lo respeta CAFT tanten cu Kamp ta forma parti di CAFT na un manera ilegal contra nos leynan. Politica ta cuminsa cu respet y momento cu no tin respet pa nos leynan, Croes no lo por tin respet pa CAFT, y lo demostra esaki publicamente den cada reunion.

Recientemente a resulta cu Kamp ta den mas baina. Tweede Kamer unanimamente a aproba un proposicion di Groenlinks y PVDA, pa haci un investigacion profundo mediante un Parlamentaire Enquete riba e extraccion di gas na Groningen cu e companianan Shell y Exxonmobiel. NAM ta e Nederlandse Aardolie Maatschappij unda Shell ta 50% doño. Pa mas di 10 aña, habitantenan di Groningen ta bringando pa stop extraccion di gas, como cu Groningen a wordo conmovi cada bes cu temblornan chikito, cual a scheur y kibra masha hopi edificio y tin e habitantenan ta biba den pena y tension. Kamp hustamente desde aña 2013 ta esun cu a pusha pa laga companianan aki sigui traha, y a ignora henter e pueblo di Groningen. Hulandesnan di Groningen tin masha rabia riba Kamp, kende como minister di Economische Zaken en Klimaat a para banda di comerciantenan multi biyonario y a laga e pueblo mes na caya.

Den un rapport di Onderzoekingsraad Voor Veiligheid a caba cu Kamp 6 aña pasa, y hasta Hoog Leraar UN Groningen a expresa: “Hier had de Minister moeten uitstappen”. Pero Kamp a ignora e rapport aki y a ricibi sosten di Rutte den esaki pa sigui trapa Groningen. Colega di Kamp di VVD, representante di Groningen, Jan Kamminga, a expresa siman pasa cu Kamp, Nam, Shell y Exxon Mobiel ‘willens en weten voor de economische belang heeft gekozen boven de veiligheid van de mens’. Croes kier ilustra cu e caso aki con sin gevoel y sinberguensa Kamp ta, y ta wordo sosteni pa Rijskministerraad den esaki. Mi ta contento cu investigacion mediante enquete Parlamentario lo bin riba e tema aki, pa asina mustra e rol di Kamp y pueblo haya sa ta cu ken nos mester deal den CAFT, esta un Kamp ilegal. Croes ta termina bisando, duna honor y respet na bo mes y respeta leynan di Aruba. Henk Kamp, entrega bo retiro.