Den Rijkswet Entiteit a inclui un artikel nobo cu ta salvaguardia nos autonomia
Parlamentario Endy Croes a splica cu poco poco nos ta yegando mas cerca cu un acuerdo cu Hulanda pa yuda nos na un manera sincero pa sali for di e crisis aki. Desde 10 di Juli no obstante cu CAFT a duna conseho positivo na Conseho di Minister di Reino pa otorga Aruba e suma di prestamo aproba door di CAFT esaki no a tuma luga. Tur esaki comokiera cu ultimo ora Knops a presenta un extra condicion den forma di un entiteit aloca den un Rijkswet cual lo a kita autonomia di Aruba practicamente den su totalidad. Riba esaki a continua cu negociacionnan fuerte y finalmente poco poco pero sigur nos ta mira e luz na horizonte.
A incorpora na artikel 4 un extra lid esta Lid 2 pa salvaguardia nos autonomia:
Den henter e negociacion y presion enorme cu Hulanda a expone Prome Minister Evelyn Wever Croes hunto cu Minister Xiomara Maduro y henter e team negociado a logra cambia pensamento di Hulanda den varios aspecto. No por laga afo e peticion constantemente di Parlamento primordialmente Fraccion di MEP kendenan tabata fuerte contra e manera cu Hulanda tabata tratando Aruba. Asina den e rijkswet aki a logra incorpora na Artikel 4 un lid nobo esta Lid # 2 unda ta stipula awor: “ Bij de uitoefenen van taken, bedoeld in het eerste lid, kan het COHO ( antes nomber di entiteit tabata CHE), geen bevoegdheden uitoefenen die op grond van het landsrecht van Aruba aan een overheidsorgaan toekomen”. Pues e artikel nobo aki ta locual nos a bringa pe y sigur nos ta mucho mas satisfecho cu Prome Minister Evelyn Wever Croes a logra pa Hulanda incorpora esaki den e Rijkswet. Esaki ta parti di e lucha husto cu nos tabata bringando pe.
Alaves a logra saca Landspakketten for di Rijkswet:
Alaves a logra saca e landspakketten for di e Rijkswet y awor manera tabata e plegaria di Fraccion di MEP pa uza artikel 38 lid 1 di statuut cual ta splica “ Nederland, Nederlandse Antillen en Aruba kunnen onderling regelingen treffen”. Pues e artikel aki semper a wordo uza desde Status Aparte pa tur protocolnan cu a wordo uza. Lid 2 di artikel 38 ta splica cu hancra esaki den Rijkswet. Awor a logra combense Hulanda cu ta saca esaki bek for di Lid 2 y ta hancra e landapakketten nan den artikel 38 lid un manera ta e deseo di Aruba.
Entiteit automaticamente lo termina despues di 6 aña:
Na inicio locual Hulanda a presenta e Ley tabata tin ingredientenan cu nunca mas Aruba lo sali di e Entiteit aki. Awor a logra cambia esaki y a haci’e hopi mas cla unda cu e pais cu kier extende esaki na final di 6 aña e mes por pidi pa extende esaki si e ta desea. Banda di esaki a introduci un evaluatiebepaling esta un momento pa evalua e Entiteit despues di 3 aña y akinan tambe lo trece espacio pa mehoracion si ta necesario of cambionan desea door di paisnan. Tambe a logra cambia e forma cu e entiteit no lo wordo aloca mas bou di Nederlandse Kaderwet ZBO. Esaki tambe ta un adelanto gigantesco. Pues asina a logra poco poco pero sigur na yega na algo hopi mas husto y sostenibel pa comunidad salvaguardiando hustamente nos autonomia y trahando den forma di cooperacion cu Hulanda na beneficio di nos futuro generacion. Nunca nos a nenga ayudo pero semper a critica e forma pero poco poco awor nos ta hopi mas cerca di otro. Noticianan positivo lo ta drentando november!
