Parlamentario Endy Croes a splica cu e reunionnan di IPKO (Interparlamentair Koninkrijks Overleg) a termina diabierna ultimo na Corsou. Parlamentarionan di Aruba, Corsou y Hulanda e reuni henter un siman largo debatiendo riba diferente topico y puntonan di agenda.
Banda di esaki a haci algun bishita di trabao entre otro na SDKK (prizon di Corsou) unda por a combersa entre otro cu Venezolanonan indocumenta den e seccion special pa esaki y alabes a ricibi un presentacion di Staf di SDKK. Tambe di acuerdo cu e programa a haci un bishita di trabao na e Hospital nobo di Corsou esta “Curacao Medical Center” (CMC), un proyecto hopi grandi di 7 diferente toren nobo, moderno y masha bunita pero alabes cu su retonan financiero.
Hulanda a pusha pa Observacion di eleccion.
Biniendo bek riba e punto di agenda “verkiezingswaarneming”, Hulanda ta esun cu a solicita pa agrega e punto aki riba agenda. Paul Rosenmoller di e partido Groenlinks kende tabata e vice delegatieleider y alabes voorzitter di vaste commissie Koninkrijksrelaties di Eerste Kamer hunto cu Jan Paternotte di e partido D66 kende tabata e delegatieleider y voorzitter di vaste commissie Koninkrijksrelaties di Tweede Kamer ta esunnan cu mas a pusha y a lobby pa purba logra nan obhetivo pa yega na un acuerdo y consenso riba e punto “verkiezingswaarneming”. Pues Hulanda a propone y a pusha pa yega na un acuerdo riba nivel di Eerste Kamer y Tweede Kamer pa Hulanda por manda su Parlamentarionan bin observa eleccion na e islanan. Den cambio cu islanan tambe lo por bay observa eleccion na Hulanda. Aruba y Corsou ta di opinion cu tin diferente instituto internacional kendenan ta eherciendo e trabounan aki rond mundo. Institutonan manera INE, MOE of tambe NDI (National Democratic Institute) kendenan tin esakinan defini con pa observa eleccionnan rond mundo.
Corsou a para banda di Aruba.
Parlamentario Endy Croes ta sigui splica cu banda di tur esakinan partidonan politico kendenan tin nan afiliacion na por ehempel COPPAL of Socialista Internacional sa haya invitacion pa observa eleccion. Nos ex politiconan di Aruba por ehempel Dirk Dumfries, Gerrit Croes y politico activo manera Joe Koolman entre otro ta ricibi invitacion regularmente pa observa eleccionnan den region. Pues Aruba no a sinti e urgencia di e punto aki pa core yega na un acuerdo cu Hulanda riba e topico aki. Parlamentario Endy Croes a bisa cu ta bon pa nos midi tambe e “achtergedachte” di Hulanda cu nan ansha pa pusha algo sin ningun reglamento y na caminda nan kier reglament’e. No way! Corsou tambe a para banda di Aruba y hunto den bloke a bay contra di e punto aki. Mester bisa cu diahuebs na ultimo ora ainda delegacion di Hulanda tabata presiona y pusha pa purba yega na un consensus.
No a acepta punto di agenda di Hulanda.
Parlamentario Croes ta bisa cu e ta contento cu Aruba a para fuerte contra esaki. Segun Croes tin puntonan di agenda manera situacion na Venezuela y consecuencianan pa e islanan cual tin mucho mas peso y urgencia. Pero a pesar cu sala a haya un presentacion amplio di Presidente di crisis coordinador di Corsou documenta cu cifranan real, nos no a sinti Hulanda cu e mesun animo pa brinda ayudo den comparacion cu nan energia cu nan a hinca pa purba logra “verkiezingswaarneming”. Esaki ta hopi remarcabel, Parlamentario Croes a sigui splica. Finalmente Griffiernan di Hulanda, Corsou y Aruba a traha incansablemente pa prepara e documento final esta e “Slotverklaring” y den e parti di verkiezingswaarneming a conclui lo siguiente : “De delegaties hebben geen overeenstemming kunnen bereiken over een vorm van structurele verkiezingswaarneming door Parlementariers binnen het Koninkrijk”. Cu esaki e punto di Hulanda no a wordo acepta y sigur nan lo bay pusha pe den e proximo IPKO cual lo tuma luga den luna di juni na Hulanda. Parlamentario Endy Croes no ta sinti cu su opinion lo cambia di awor pa juni riba e tema aki.
