Parlamentario Endy Croes: Ley di Serlimar ta riba agenda ‘A reuni, a scucha, a bin cu amienda cu cambio y a bin cu nota di cambio pa e bienestar general’

Parlamentario Endy Croes den durante conferencia di prensa semanal di Fraccion di MEP a toca e tema di ley di Serlimar dialuna mainta. Croes a splica cu e Ley landsverordering instelling Servicio di Limpiesa di Aruba (AB 2005 no. 5) ta riba agenda pa continua awe mainta, dia 15 di october.

Durante mas di un siman despues cu e reunion a wordo aplasa a sigui traha duro riba e preocupacionnan di habitantenan di e bario di Simeon Antonio y di stakeholders. Dump na Parkietenbos ta existi como 70 aña y mas di 20 aña pasa un Hulandes a traha un rapport riba ceramento di dump.

A reuni cu varios stakeholders.
Den programa di gobernacion firma pa e 3 lidernan esaki ta ancra cu lo traha pa soluciona e problema. Asina Parlamento di Aruba cumpliendo cu su trabou a reuni cu varios stakeholders, a scucha, lo bin cu un amienda mañan cu tin ingredientenan aden di mayoria stakeholders y e bario y manera a compronde den e primera tanda minister lo bin cu nota di cambio pa atende cu demas inkietudnan buscando asina e balans total den e ley aki pa e por wordo carga pa parlamento y henter e pueblo. Parlamentario Croes a sigui bisa dificilmente den bida bo por complace tur hende pero importante ta pa bo por tin un balans cu ta carga sosten di gran mayoria di pueblo. Interes general ta exigi cu mester atende cu dump y e no por keda wordo opera mas asina den e circunstancianan actual.

Citacion for di Rapport di PAHO.
Croes a bay over pa cita algun parti di e rapport di PAHO di mas di 60 pagina di maart 2018 pa pueblo por compronde e gravedad. 6.5.2.2 “La quema de estos residues genera humo y material particulado que afecta al sistema respiratorio de la poblacion aledaña” (hendenan den cercania). Un otro parti 6.5.2.5 “La presencia de residues lleva al incremento de plagas y animales no deseados por su potencial hospedero de enfermedades infectocontagiosas (como ratas, aves, moscas, cucarachas, mosquitos) que causan enfermedades infecciosas a la poblacion del entorno”. Agregando un capitulo mas pa pueblo compronde e gravedad di e situacion actual riba dump. 6.6.1 “Estos animales que se alimentan de residues, pueden propogar diversos tipos de enfermedades, ya que se alimentan de residuos mezclados con DESECHOS INFECCIOSOS O PROVENIENTES DE HOSPITALES Y CENTROS DE SALUD o de otros lugares contaminados donde la basura se descarga sin ningun tipo de separacion previa ni tratamiento”. Pues lesando e rapport aki traha pa PAHO, esta Panamerican Health Organisation y Organisacion Mundial de salud, kendenan tabata na e sitio pa mira tur cos pa por a traha e rapport aki nos mester ta consciente cu interes general mester prevalece.

Croes ta termina bisando cu futuro lo mustra cu a tuma un bon decision pa cu saneamento, ceramento di Parkietenbos y habri un sanitaire landfill nobo.