E parlamentario Jacintha Constancia di partido MFK ta cera pa motibo cu el a duna un otro parlamentario un wanta den su cara durante un debate publico den parlamento ayera.
E victima ta e parlamentario Giselle McWilliam di partido MAN cu despues di e sla, a mustra cu su nanishi a sangra. El a entrega un keho contra sra. Constancia. Relaciona cu esaki Ministerio Publico di Corsou a saca un relato indicando cu nan a detene sra. Constancia ‘op heterdaad’ (pues na momento di e acto). Landsrecherche a cuminsa un investigacion penal a base di e denuncia di McWilliam di maltrato. Pero tambe a base di un otro denuncia di parlamentario Elsa Rozendal contra sra. Constancia di menasa.
Sra. Constancia ya a pidi su disculpa y a anuncia cu lo tuma su retiro como parlamentario. Su partido MFK y tambe mayoria di e otro miembronan di parlamento a condena su acto. E parlamentario a bisa cu el a rabia riba sra. McWilliam pa motibo cu e victima tabata haci cierto remarkenan durante e debate riba un caso penal andando unda sra. Constancia tambe ta envolvi. E ta trata di un investigacion penal den bendemento di mascara medicinal.
Riba e website y Facebook di Bon Dia 24 por haya e video di e momento cu sra. Constancia a duna sra. McWilliam un wanta duro den su cara. Riba e potretnan por mira e herida riba e cara di e parlamentario victima. Riba e Facebook di parlamentario Jacintha Constancia, cual ta habri pa publico, por lesa cu mayoria comentario ta condena e actitud di e parlamentario. Sinembargo tambe por lesa un par di hende post nan aprecio.
