Recientemente por a lesa un comunicado di parlamentario sr. Mike de Meza unda e mustra nervioso pero tambe ta duna muestra di desesperacion unda cu na manera infunda ta trata na crea polemica. Su persona ta purba descredita un gobierno cu den tempo di crisis ta haciendo lo maximo pa por crea cupo di trabou y sigur entrada pa pais Aruba na trata na crea diferente pilarnan economico. Parlamentario Mike de Meza den su desesperacion kier bin crea storianan unda cu tin movecionnan pa beneficia amigonan y unda hasta ta insinua cu hasta FMSA lo ser traspasa pa hendenan liga na gobierno.
Movecionnan positivo pa RDA.
Na prome luga tur trabou den rafinaderia ta ser cualifica como “essential business” mescos cu Elmar y WEB pa percura pa tur cos ta cana bon pa suministro di fueloil pa por genera awa y coriente pa pueblo y e movecion aki a haci Parlamentario de Meza nervioso.
Dia 15 di mei cu a pasa a cera anuncio di interesadonan pa huur di tankinan. Hopi grupo a expresa nan interes y awo ta den e proceso di screening p’asina pronto por presenta na un manera transparente e grupo cu lo huur e tankinan.
Pa locual ta e proceso di rafinaderia lo ser encamina 3 trayecto simultaneamente;
⁃ busca operador nobo
⁃ busca inversionista den un otro industria relaciona cu rafinaderia por ehempel LNG
⁃ busca inversionista pa un industria nobo
E trayectonan aki mester tene cuenta cu e siguiente exigencianan; mester percura pa cubo ekivalente na un rafinaderia, cumpli cu exigencianan di medio ambiente, y por cumpli su ‘fairshare’ pa gobierno.
E luna aki e lo encamina e proceso aki di expresion di interesadonan p’asina evalua e proporcion di esnan interesa.
Speransa.
Sigur ora pueblo wak Gobierno ta encaminando un proceso transparente y sigur uno cu pueblo lo sali faborece. No manera ta e practica di pasado unda cu amigonan tabata haya y tambe sigur nos no kier wak pasa mas locual a pasa den e proceso di Citgo unda cu a crea speransa falso y unda cu na final di dia pueblo di Aruba a sali perdi.
Mi ta hopi positivo cu banda di nos por huur nos tankinan cu nos tin para desde 2016 y cu por genera algun miyon florin den temponan dificil aki y sigur mirando e interes pa inversionnan den industria nobo ya expresa cu prome cu fin di aña nos por cera un aña dificil pero cu speransa su cu 2021 por habri positivo.
Hendenan negativo manera AVP y parlamentario Mike de Meza Aruba no mester mas paso nos Gobierno y nos Prome Minister ta trahando cu alma y cuerpo pa por diversifica nos economia pero sigur crea entrada y cupo di trabou pa Aruba.
