Parlamentario Edgard Vrolijk(MEP): ‘Cu terminacion di contracto cu Citgo ta crea oportunidad nobo y sigur un speransa den temponan nos dilanti’

Pronto Parlamento di Aruba lo tin di atende cu un ley unda cu ta autorisa Gobierno pa termina e relacion cu Citgo. Un relacion cu a cuminsa cu hopi speransa na 2016 cu cantidad di fiesta y bulamento den avion priva cu a costa casi 900.000 florin cu nunca nos por a experencia su apertura. Sigur un factor cu a haci imposibel pa por a conoce e apertura tan desea tabata e sancion di Merca riba Citgo y PDVSA pa por a yega na e fondonan pa renoba y inverti. Pa e motibo ey pa basta tempo caba tur trabou pa un reapertura ta practicamente paralisa. Y debi na e sancion aki CITGO mes a duna di conoce cu nan no lo por cumpli mas cu palabracionnan haci den e “ definitive participation agreement” y ta desea riba propio boluntad pa termina esaki.

Negociacion cu Citgo.
Pa hopi tempo Gobierno y Citgo tabatin negociacion riba pagonan di empleado, inversionnan cu no a tuma logra di parti di Citgo, debe di huur y tambe impuesto. Despues di basta tempo di deliberacion a yega na e palabracionnan cu Citgo ta bay paga su debe di impuesto cu ta 16 miyon dollar(28,8 miyon florin). Banda di esaki Gobierno a exigi pa Citgo a cumpli cu e trahadonan y tur a ricibi cu a tene cuenta cu nan beneficionan y añanan cu nan labora den rafinaderia. Citgo di basta tempo no por a cumpli cu e contract cu nan a firma y den bista cu e embargo cu tin riba cuentanan di Citgo relaciona cu sancionan di parti di Merca ta haci cu no por cumpli cu e contracto aki. Di parti di Gobierno, Citgo y expertonan imparcial a conclui cu Citgo no tin placa pa paga nan huur y tampoco pa haci e inversionnan necesario na e terminal ni e rafinaderia. No tabatin otro opcion pa pais Aruba cu termina e relacion cu Citgo y sigur den bista di interes ey for esaki ta crea oportunidad y speransa nobo pa nos economia cu terminacion di e contracto aki.

Speransa pa Aruba.
Den bista cu locual a ser treci dilanti pa Aruba na e momento aki ta oportuno pa sali di e relacion cu Citgo. Nos tin e oportunidad den nos man pa capitalisa riba e oportunidad nobo aki. Establece un rafinaderia nobo of un industria nobo cu ta crea cupo di trabao ta un necesidad na e momentonan aki. Y sigur na e momentonan aki den bista di e prijs di petroleo nos terminal tin un gran oportunidad di crea entrada pa pais Aruba. Awo mas cu nunca den bista di e crisis cu nos pais ta den actual pa termina e relacion atraves di un ley cu ta tene na cuenta cu e aspectonan legal.

Pa conclui.
Na e momentonan aki a escoge e caminda di terminacion mutuo enbes di sigui e caminda largo cu e contracto ta indica, cu lo ta uno cu lo dura añas y cu na final no lo saca nada paso no Citgo ni PdVSA ta den posicion di inverti y cumpli cu pagonan y sigur nos lo ta riba un lista largo di esnan cu tin embargo cu lo haci e situacion uno hopi dificil y casi imposibel pa Aruba. E ley ta termina e claim di pais Aruba riba Citgo p’asina por busca un operador nobo pa nos rafinaderia y percura pa e terminal ta operacional y explora e posibilidad di expansion di mas industria na e terenonan cu lo ta di pais Aruba bek. Tin hopi interesado den e rafinaderia y terminal y nos pais ta den necesidad di un pilar economico mas den bista locual a pasa cu nos unico pilar economico ya haci mas necesario pa crea un di dos y mas pilarnan economico rapido pa nos por restart nos economia pa pais Aruba por ta riba su pianan mas fuerte cu nunca.