Parlamentario Edgard Vrolijk: ‘Nos mester paz den enseñansa’

Comision di enseñansa den Parlamento a interveni pa atende cu e diferente malcontento riba e cambionan cu Minister Rudy Lampe kier introduci riba tereno di enseñansa. Un di nan riba Traimerdia y Scol Pa Ofishi (SPO).

Parlamentario Edgard Vrolijk (MEP), kende ultimo tempo ta bin fungiendo como presidente di e comision aki, a bisa cu bou su insistencia, a bin cu claridad riba e situacion di enseñansa; ya cu no por cera aña escolar sin cu e docentenan sa kico lo pasa den SPO y na Traimerdia, pero tambe riba nan futuro. “Na e momento aki mi ta kere nos mester paz den enseñansa,” el a bisa.

E Parlamentario ta convenci cu den un ambiente di paz, trahando cu otro y dialogando, ta e ambiente ideal pa haci e cambionan den enseñansa. Nan a pidi un reunion cu e Minister encarga, Rudy Lampe (RED), pero e dia cu a tene e reunion publico aki, esaki a bira casi nada, mirando cu varios Parlamentario mester a biaha su dia siguiente pa Hulanda. Despues nan a reuni cu Lampe, caminda su contestanan no a cay na agrado di e docentenan tanto di SPO como di Traimerdia. Esey a haci cu ‘a bin mas manifestacion y mas rabiamento’, segun parlamentario Vrolijk.

Pesey un trio di Parlamentario conforma pa Vrolijk hunto cu su coleganan di fraccion, Endy Croes y Hendrik Tevreden, a bin busca otro forma di acercamento pa atende cu e situacion aki. Nan a bay papia cu Prome Minister, caminda Parlamentario Vrolijk a bin cu dos concepto pa wordo trata den Conseho di Minister. Un tabata pa saca Traimerdia for di enseñansa y hink’e den e cartera di Minister di Asunto Social, Glenbert Croes. Nan ta consider’e como algo social; ya cu e ta un sorto di cuido despues di scol, unda nan ta yuda e muchanan cu nan tarea, pero despues e ta algo cu no ta di scol. Otro proposicion ta pa tene SPO Brasil na su concepto.

Tambe den su concepto Vrolijk a recomenda pa Enseñansa Pa Empleo bay pa e cartera di Minister di Labor. E ta kere cu Conseho di Minister a tuma e decision adecuado di trece paz y duna tempo pa trece e cambionan den enseñansa. Nan a papia cu tur e autornan y nan a ripara cu nan no tin miedo di e cambionan, pero si nan kier un cambio structural y cana segun procedura.

Traimerdia
Contestando pregunta di Bon Dia Aruba, Vrolijk a bisa cu a bin cu e decision di saca Traimerdia for di e veld di enseñansa y re ubica esaki den e veld social. E ta kere cu mester acopla e parti di e cuido di e muchanan cu mester di e atencion special aki y esaki mester continua. Den esaki e cartera di Croes ta pas cu e vision aki. Te hasta e mandatario kier amplia e rol di Traimerdia pa scol secundario. Igualmente e ta pas cu e desaroyo cu kier bin den e diferente centro di bario.

Apesar cu Traimerdia ta bay cay bou Ministerio di Asunto Social, e aspecto cu tin di haci cu ayudo di enseñansa pa e muchanan, no ta bay kita. E ta kere cu di e forma aki Traimerdia ta sigura su existencia pa futuro, pero su exito tambe. Encuanto si e tipo di cambio aki na nivel di enseñansa ta mara na e Plan di Gobernacion, Vrolijk a bisa cu gobernacion ta algo dinamico, ya cu cosnan ta cambia di awe pa mañan. “Bo por tin un plan, pero bo tin cu adapta na caminda, y mi ta kere esey nos ta haci”.

E ta haya fastioso cu prome cu fin di aña escolar, e mandatario di enseñansa kier bin cu cambio ‘sin cu hende ta spera p’e.’ E ta agrega cu e cambionan mester ta concreto, sino ta trece caos; y esey a pasa. Awor lo bin den un periodo pa revisa tur cos y percura cu tur cos por cana debidamente.

Segun Vrolijk, nan ta conoce structura caba di Traimerdia y den nan opinion nan mester amplia e concepto cu tabatin. “Esey kiermen, bo no mester trece cambio. E ta funciona pa 23 aña caba!” Pero e ta kere cu mester ta un dependencia social despues di scol. Es decir, e muchanan cu na scol basico ya caba ta wordo atendi pa problemanan social cu ta bay Traimerdia, y mester pensa pa bin cu docentenan cu ta bin duna arte, musica pa e muchanan.

Concepto pa SPO
Nan a recomenda pa tene SPO Brasil na su concepto. Esun di Sta. Cruz, haci’e uno completo cu un curriculum di 4 aña. Nan lo percura den e presupuesto pa tur cos cu falta por drecha esaki. Esaki a wordo trata den Conseho di Minister, cu a duna su aprobacion. El a bisa cu existencia di SPO ta defini pa largo tempo. Pero e ta bay wordo structura completamente. E tabatin elogio pa e docentenan cu a traha nan mesun material. Awor nan ta spera cu e curriculum por wordo aproba pa Inspeccion di Enseñansa.

Igualmente el a laga sa cu e proceso di inscripcion pa ricibi studiantenan nobo den ambos SPO a cuminsa. Ayera e inscripcion a cuminsa pa e muchanan cu a bay enseñansa special. Tambe nan a cuminsa tuma e muchanan di prome aña, locual Minister a bisa prome cu no tabata e caso.

Despues di compila tur informacion di tur hende, te hasta nan a realisa un bishita na SPO-Brasil, unda nan por a mira un e ta un edificio bunita y nobo, pero yen di mancamento. El a compar’e cu e proyecto di hospital. E ta haya cu edificio aki no ta esun ideal pa un scol di ofishi y eventualmente mester inverti pa amplia e localidad aki. Ta asina cu nan a manda un rapport na Prome Minister, mustrando cu e luga aki no ta adecuado pa hinca dos scol hunto.

Vrolijk ta bin atendiendo cu e comision Parlamentario di enseñansa, ya cu Parlamentario Ricardo Croes, cu ta presidi e comision aki, tabata na Hulanda pa asisti na reunion di IPKO, pero tambe el a presenta problema di salud. Esaki a haci cu Vrolijk, kende ta bin di e sector di enseñansa, mester a tene varios reunion, entre otro cu SPO, pero tambe cu e esunnan cu a protesta y entrega un manifiesto pa atende cu Traimerdia.