Parlamentario Edgard Vrolijk: Mester bin cambio den nos sistema pa evita mas corupcion

Durante e prome buelta di e tratamento di e rapport di Contraloria General (ARA) riba e proyectonan ‘Bo Aruba’, parlamentario Edgar Vrolijk (MEP) a bin cu un fuerte cuestionamento riba nos sistema institucional.

Vrolijk su opinion ta cu nos sistema merece pa bin cambio pa evita cu tipo di situacion asina cu ta bin sucediendo durante e ultimo 34 aña no bolbe ripiti. El a yega di ripiti un frase cu el a scucha for di e ciudadano Roky Kelly cu a bisa cu: “Nos sistema ta traha pa corupcion.”

E ta haya cu si nos no ta introduci cambio den nos sistema pa preveni y evita situacion asina, ‘nos mes ta creando e caminda pa sigui tin corupcion den e pais aki.’

Vrolijk tabata hopi critico den su ponencia, unda no solamente e ta haya cu minister mester ta responsabel riba e gastamento di placa di proyecto infrastructural sin medida ni control, sino e mesun directornan di e departamentonan concerni. Tambe e ta haya cu cierto procedura no ta tumando luga manera debe ser di forma diligente, entre nan ARA.

E ta haya cu e instancia aki ta pertenece y ta traha pa Parlamento. El a referi cu su colega y lider di fraccion di MEP a papia di un serie di carta cu a bay bin for di ARA pa e minister en cuestion, pa asina e responsabilisa su mes dilanti parlamento, pero nada a sucede.

Pero e kier sa mas splicacion di ARA riba e procedura pa atende cu e situacion aki pasobra e tin entendi cu e organo aki ta pertenece y traha pa parlamento. Pero tambe si parlamento a haci su debido trabou e tempo aya. Ya cu e prome organo cu mester funciona ta parlamento cu mester haci su debido trabou di control.

Den e mesun linea aki, parlamentario Vrolijk, a puntra su mes con por responsabilisa e gobierno anterior di e malgastamento di placa den proyectonan infrastructural. “Un hende mester carga e responsabilidad di e cos aki,” el a bisa.

E parlamentario a indica cu dos aña e situacion aki a tarda pa determina si e maneho aki riba finanzas publico tabata incorecto. Pasobra e ta considera cu na momento cu tipo di rapport di e caliber di ARA ta keda warda den lachi, nan ta aprobando maldad di otro gobiernonan.

Fraccion di MEP a keda di entrega un mocion pa encamina e proceso di esunnan responsabel pa sumanan cuantioso cu no por wordo responsabilisa of cu a wordo gasta si cumpli cu e ley corespondiente. Ademas mester coregi e hecho cu e suministro di informacion tabata insuficiente pa parlamento por cumpli cu su tarea di control.