E siman cu ta bin lo ta uno unda cu parlamento pero tambe gobierno tin di tuma decisionnan importante den e proceso pa restart nos economia pero sigur tambe crea stabilidad den nos pais unda cu hamas nos por a biba di pensa cu un virus por a trece asina tanto caos den un periodo asina cortico.
Jaarrekening 2016 – 2017 – 2018
Pa otro siman nos tin jaarrekening 2016,2017 y 2018 pa aproba den parlamento p’asina nos por caba di cumpli cabalmente cu un di e puntonan di preocupacion di CAFT den consehonan.
Presupuesto supletorio
Ta di vital importancia pa atende y aproba e presupuesto supletorio p’asina por garantisa esunnan riba fase y loonsubsidie cu nan por conta riba gobierno por lo menos te cu fin di aña y sigur tambe pa garantisa inversionnan p’asina por yuda reactiva nos economia pero tambe garantisa stabilidad y asina por stimula mas inversion den nos economia. Y alabes nos prioridad ta pa percura pa pusha pa 2021 por habri nos cu speransa cu nos por tin otro pilarnan economico banda si nos turismo cu nos ta hopi optimista cu lo recupera liher.
Mester keda cla cu Hulanda
Nos por a tuma nota cu nos Prome Minister Evelyn Wever-Croes ta hopi avansa cu negociacion cu Hulanda y sigur ta wak un luz na horizonte. Pa nos di parlamento ta hopi importante pa caba e negociacion aki pa por garantisa cu pueblo por ta trankil. Sigur cu lo ser inverti pa stimula sectornan nobo pero tambe lo tuma decisionnan cu ta garantisa sostenibilidad pero sigur percura cu nos por ta prepara pa cualkier shock externo. Asina tambe nos ta percura pa tin un finanzas sostenibel y percura pa locual a pasa di 2009 pa 2017 nunca mas pasa unda cu a hiba un maneho desastroso financiero cu hamas por ser ripiti.
