Mi por a tuma nota cu mirando cu no tin argumento politico valido, awo partido AVP ta manda nan lora nobo Sr. Junior Croes pa purba atacha mi persona den e funcion di Presidente di Parlamento. Normalmente mi no ta haci caso na e barbaridadnan aki sin niun contribucion pa pais Aruba, pero ta bon pa mi aclaria e mito crea door di su lider fracasa Sr. Mike Eman y unda Sr. Junior Croes manera lora ta ripiti locual e doño di e lora bis’e.

Locura di yama reunion te 2025

Por a tuma nota cu Sr. Junior Croes ta ripiti e storia di su lider Mike Eman cu lo yama e reunion pidi cu OPPA te aña 2025 y cu ta haci Sr. Junior Croes oficialmente e lora nobo di AVP. Si Sr. Eman ta asumi su rol di lider di fraccion y ta bin trabao manera debe ser e lo sa cu tin un maneho riba peticionnan pa reunion. Tur peticion cu ta encera gremionan, cu no ta carga responsabilidad politico, ta ser manda pa comision y e comision tin di yama e reunionnan aki. Reunionnan pidi cu ta atende cu personanan individual ta ser nenga paso e ta kibra ley di proteccion di persona. Den e caso specifico aki e peticion a ser manda pa comision y ta keda na e comision pa yama esaki.

E number 25 ta den nan consenshi

Locual ta biba den consenshi di Sr. Mike Eman y sr. Junior Croes ta e masacre di 25 aña, unda pueblo tin di paga anualmente 280 miyon na interes so pa e MEGA DEBE cu Mike Eman a laga atras. Awo pueblo tin di soda y sufri pa pag’e y e uniconan cu ta orguyoso pa paga debe aki ta Sr. Mike Eman y Sr. Junior Croes. Banda di esaki e number 25 tambe ta ilustra 25 aña di pago anual di 90 miyon florin na e proyectonan PPP. Hopi hende ta gaba cu nan por wak unda e placa cu Mike Eman a gasta ta bay pero e ta completamente eroneo, paso e proyectonan PPP ta adicional na e Afl. 2,2 biyon cu Sr. Mike Eman a fia y unda cu orguyo nos tur tin di keda paga pa 25 aña. Pues kisas e consenshi ta remorde cu nan a masacra pueblo pa 25 aña cu ta bin cu e mito di tene reunion te 2025.

Mike Eman kier haya simpatia e pensionadonan despues di a masacra nan

Sr. Mike Eman y sr. Junior Croes tin hopi curashi pa hunga cu sentimento di pensionadonan pa logra nan simpatia, despues cu nan a masacra nan. Sr Mike Eman ta e autor di aumenta edad di pensioen di 55 aña pa 65 aña den 8 aña di su gobernacion. A kita tur pensionado cu ta ambtenaar desde 2015 tur nan premienan y sigur cu e MEGA DEBE crea a haci cu di un manera of otro mester paga esaki bek cu ‘orguyo’. Mester a bin cu ahustacion cu ta haci bida di e pensionadonan hopi mas dificil, unda no tin espacio mas pa absorbe nada debi na e Mega Debe ta horcando nos y cu lamentablemente, incluyendo nos pensionadonan, nos tin paga pa 25 aña e mal maneho financiero di Sr. Mike Eman.

E unico bibando lekker ta Sr. Mike Eman

Sr. Junior Croes tin di sali y puntra su lider Sr. Mike Eman con e por a biba di 2017 te cu 2021 den su Penthouse luhoso, comiendo bon, cu yen di tempo pa skirbi buki y hasta den un pandemia no a aplica pa Fase mientras pueblo eyfo si a perde trabao y si a pasa duro. Su lider Mike Eman si tabata biba lekker y come na grandi y esey ta demostra cu Sr. Mike Eman a acumula hopi den su 8 añanan riba custia di pueblo cu e por keda 4 aña sin traha y biba lekker na grandi.

Sr. Junior Croes ta durf? 
Mi por a tuma nota cu Sr. Junior Croes ta ataca mi persona cu e meta pa desacredita mi, pero mi tin di desilucion’e paso tur locual mi tin y tur hende sa tambe, mi tabatin hopi mas prome cu mi a drenta politica. Den mi profesion como maestro, cual por cierto mi ta hopi orguyoso di e profesion, ami hunto cu mi casa a percura pa tur locual nos tin awe. Mi no sa si Sr. Junior Croes ta envidia cu ami a logra mi cosnan na un manera husto y a base di trabao duro y cu mi no mester a bira lora di niun hende pa logra mi cosnan. Ademas, den cuadro di transparencia, como cu pueblo completo sa mi salario, mi ta reta Sr. Junior Croes pa publica unda e ta traha, publica su salario y tur su beneficionan cu su persona tin na su trabao y pa e ora pueblo por wak ken ta esun cu di berdad ta biba lekker! En todo caso mi consenshi na trabao ta limpi, pero kisas ta bon pa Sr. Junior Croes haci un evaluacion di su consenshi na trabao pa wak si esaki por ta trankil.

 

Mi ta termina cu mi ta lamenta di mester a reacciona riba Sr. Junior Croes, pero ta bon pa clarifica un mito di Sr. Eman cu su lora nobo Sr. Junior Croes ta ripiti y sin wak e balki real den nan propio wowo kende ta esun cu te dia di awe ta biba lekker den su Penthouse. Tambe ora Sr. Junior Croes publica su salario y beneficionan di trabao pueblo por wak ken realmente ta esunnan cu ta biba lekker.