Mi a haya mi mes ta scucha e locuranan di Mike Eman, pasobra hopi hende a pidi mi pa scuch’e y pa trece mi pensamento riba esaki. Scucha Mike Eman ta mescos cu laba cabes di burico: bo ta perde awa, habon y mas importante tempo. Pero pa e biaha aki, mi a dicidi di perde mi tempo pa scuch’e keriendo cu e lo trece speransa pa e pueblo, pero e palabra cu e kier laga penetra den pueblo ta: ‘No ta normal’. Awel, laga nos pone riba un lista kico no ta normal.
E lista di ‘No ta normal’
No ta normal pa endeuda e pais aki sin misericordia y pon’e bao supervision financiero y hamas por a yega na un surplus, pero a redobla nos debe nacional te 4.2 biyon florin.
- No ta normal pa crea debenan di 2 biyon na proyectonan PPP sin cu nunca bo a splica for di unda ta saca placa pa paga pa e proyectonan aki den e proximo 30 aña.
- No ta normal pa gasta mas di 900 miyon florin di placa di pueblo cu e gobierno di MEP a laga atras na 2009.
- No ta normal pa masacra e aspecto social na Aruba.
- No ta normal pa manda e pensioen te 65 aña.
- No ta normal pa introduci e Middellooon regeling, cu awe ora e pensionado baha cu pensioen e lo wak cuanto el a perde di su pensioen y ainda falta esunnan cu falta hopi pa baha.
- No ta normal pa kita e medida mas cruel di e AOV di pareha.
- No ta normal pa laga Richard Arends masacra tur NV y tambe percura pa su mes un contracto lucrativo den RDA.
- No ta normal pa laga haci negoshi formal cu tereno di pueblo haciendo amigonan miyonario y pueblo mas tristo pa paga e debe orguyosamente cu Eman mes a crea.
- No ta normal pa apoya tanto corupcion, cu hasta un minister di Labor, Paul Croes a wordo condena y a sigui cobra su salario di ministro trankilamente den prizon y esaki cu aprobacion di fraccion di AVP.
- No ta normal cu a laga Aruba su nomber na berguensa den exterior den e caso di Citgo, unda cu ta considera Aruba un paraiso di corupcion y unda cu Minister di Energia y Labor y consehero di AVP ta core den limousine y cera negoshi cu esunnan cu awe ta cera pa corupcion.
- No ta normal pa regala tereno di Aruba na e grupo di Citgo pa haci comercio aki na Aruba, cu awe e grupo aki ta cera pa corupcion.
- No ta normal cu un Prome Minister cu a gaña pueblo cu lo habri refineria y lo bin cu un pilar economico berde pa Aruba, a tuma un pueblo haci y kier papia di desaroyo economico cu kisas ta pa su persona y brothernan.
- No ta normal cu un ex Prome Minister sin salario por biba den un Penthouse mientras pueblo cu hopi orguyo tin di paga e debe cu el a crea.
Nos por sigui yena e lista largo aki pero no tin luga mas pa pone den corant. Pero un conclusion cu por saca ta cu Eman no por ta normal di kere cu pueblo ta asina ingenuo di por ker’e, mientras cu tur desaster y sigur e debe monstruoso cu el a laga atras pa pueblo bay paga, esey pa mi no ta normal.
Comments are closed.