Diahuebs ultimo nos a trata den reunion publico e terminacion di e contracto di Citgo. Sigur porfin e pagina di Citgo a yega su final. Despues cu na 2016 a firma un contracto pa rehabilitacion di nos refinaderia y unda cu pais a duna Citgo nos terminal y tankinan pa nan por mantene esakinan y sigur percura pa crea entrada y tambe empleo pa nos pueblo. Y sigur e esencia di e reunion ta e pregunta cardinal lo ta regalando Citgo $175 miyon dollar.

Ley di 2016.
E garantia di $175 miyon dollar aki ta uno cu ta destina pa desmantelacion si dado caso Citgo dicidi di desmantela e lo por depende e daño hasi un maximo di $150 miyon dollar destina pa esaki y cu gobierno no lo haya ni un florin pero ta e compania mes lo dicidi ta ken y con lo haci esaki.

Pero un punto importante ta e ley di 2016 cu parlamento di Aruba e tempo ey di signatura berde a pasa un ley unda ta exonera di 1989 te cu 2016 tur compania petrolero cu a explota e refineria di nan responsabilidad di dañonan haci na medio ambiente. Pues Citgo a haya e refineria sin ningun claim pa daño ambiental y sigur den bista cu di 2016 pa awo nada no a ser haci e daño ta uno minimo.

Caminda huridico largo.
Pa por yega na e poco cu por claim e caminda legal ta uno largo pero sigur basa riba un articulo conoci como ‘fors majeure’ unda cu e sancionan di Merca ta cay den e articulo aki cu ta haci e situacion mas dificil pa procede. Banda di esaki ora a firma e contract aki a cera cu e compania cu no in placa y unda cu si logra gana e caso gastando hopi placa cu no tin, pa yega na esun cu tin esaki lo bo bay riba lista di creditornan cu tin embargo riba PDVSA. Y sigur pa ora caba e proceso aki no tin nada mas pa scapa y unico cos cu lo keda ta pa desmantela y ta esey ta claramente locual cu AVP kier.

Speransa nobo.
E terminacion aki ta duna speransa cu sikiera a corto plazo por cuminsa opera e terminal y tambe haci uzo di e tankinan pa por wanta petroleo y crea entrada cu nos mester den bista di e crisis aki. Y banda di esaki por cuminsa busca opcionnan industrial riba e terenonan aki y sigur sigui explora si tin posibilidad pa un refineria mas moderno. Y awe cu e terminacion di e contract di Citgo aki mañan mes lo drenta $10 miyon dollar y otro siman otro $ 6 miyon di belasting y unda cu e lo yuda e luna aki cu entrada cu mester bay pa yuda esnan cu a perde trabou.

Den tur tempo dificil aki nos mester keda cu speransa cu cos lo bira miho pa nos na Aruba.