Awe yamadanan a drenta na mi persona y sigur nan sa mi pasion pa deporte y movecion sano cu Landamento Escolar lo termina dia 31 di december 2020, unda esaki a ser comunica na e seccion di Landamento Escolar por medio di e directora di Enseñansa den nomber di Minister di Enseñansa na e trahadornan.

Y mi a keda sorprendi paso esaki ta un di e programanan cu mas exito na Aruba y sigur a percura pa e porcentahe di risico di hogamento na Aruba a keda abao desde cu esaki a ser funda y sigur como nos ta un isla rondona cu lama un gobierno mester percura pa su ciudadanonan ta safe. E motibonan cu a ser duna door di e directora riba instruccion di e Minister di Enseñansa ta haci esaki ainda mas preocupante.

Motibo usa pa kita e seccion di landamento escolar p’ami sigur no tin ningun argumento valido.

Motibonan di Minister pa termina e proyecto aki 31 di december 2020

Esaki ta e siguiente motibonan y mi lo reacciona di biaha riba nan:

  1. Scolnan ta bay 100% online. Tin di recorda cu ta trata aki di Landamento Escolar pa klas 3 di scol basico y cu scolnan basico na Aruba ta den mayoria 100% hayando les na scol. Y sigur ta bon pa e directora den nomber di e Minister di Enseñansa sali y bin afo y duna cu cifra ta cuanto scol basico y cuanto mucha di klas 3 ta hayando 100% online les. Y sigur tin di recorda cu e trayecto di scol primario y scol basico ta dirigi pa stimula digitalisacion y tecnologia como hulpmiddel unda ta siña e mucha haci uso di tecnologia corectamente pa obtene informacion y usa esaki corectamente pa ora e yega scol secundario por drenta e trayecto di online study mas facil. Y sigur un problema ta keda ta e acceso na e data y sigur e pregunta cardinal ta desde comienso di COVID a prepara tur scol pa e era aki? Y a sondea si tur mucha tin acceso na internet of tin e modo di por tin e devicenan cu nan por haci nan estudio online?
  2. Hulanda ta bin controla y haci doorlichting den enseñansa: kico ta kerntaken di enseñansa y trabaonan cu mester haci. Ta di unda a saca e conclusion cu mester kita e grupo aki? A laga Hulanda haci doorlichting caba sin nos sa ? Ya a permiti Politiek den Haag sinta riba stoel di Minister? Si por sigui e motibo aki tambe e conclucion ta cla: nos no mester un Minister tampoco mas si Politiek den Haag ta bin bisa con y ken lo mester kita di trabao? Y pa refresca memoria di esnan cu ta papia e tipo di disparatenan aki cu esakinan ta e puntonan di doorlichting si e bin pa locual ta e paketenan di enseñansa: onderwijs kwaliteit, lesmethoden en middelen/ aansluiting tussen onderwijs en arbeidsmarkt/ doorstroom KO, PO,VO en MBO/HO/WO/ doelmatigheid en doeltreffend van de onderwijsbekostiging, mitigeren van de inefficiënties in het systeem, versterken van de kwaliteitsverbetering door effectief toezicht door onder andere de inspecties.
  3. Tin mas y mas maestro di movecion y salud den curiculo di scol y pa es motibo no por sigui cu schoolzwemmen mas. Si ta pensa di bay e rumbo ey e ora e scol mester bira manera e ta na diferente scolnan na Hulanda, unda e maestro di movecion aki ta esun encarga tambe pa duna landamento escolar, nos ta cla pa esaki?
  4. Per 1 januari 2021 e proyecto aki ta caba. Un abuso y sigur cu den tempo di crisis unda nos Gobierno a fia placa pa yuda tur trahador den sector publico y sector priva y sigur den esaki a tene cuenta cu e grupo aki tambe y net awo den e periodo di recuperacion ta bisa e grupo aki bay cas.
  5. Ta busca otro formula pa duna zwemmen y a menciona e metanan di primair onderwijs pa locual ta cuminsa experiencia cu awa y ta papia di e grupo di 9 pa 12 anja cu ta vaardigheden ta e esencia di mas importante den e curriculo nobo unda cu zwemmen no tin un rol mas: desde ki dia landamento no ta un vaardigheid mas? Landamento ta un di e miho ehercicionan pa mehora motorica di un hende y no ta ser considera mas un vaardigheid? Ta di unda ta saca e cosnan aki?
  6. Cu e curriculum di movecion y salud pa primair onderwijs (kleuter) tin watergewenning y zonder vrees, confortabel voelen y den e curriulo nobo di basisischool landamento escolar no ta un kerntaak mas pues no mester di dje mas. Ta ken a conseha e cosnan aki? Na Hulanda e motibo pakico tin schoolzwemmen como parti di curriculo ta pa stimula motorica pero e meta primordial ta mantene e risico di hogamento abao como cu nan ta un waterland.

Mi ta spera cu locual a ser trece na mi ta un fakenews, paso p’ami e ta espantoso di por pensa cu ni a firma cu Hulanda y ya ta corta nos hendenan cu tin 28 aña ta haci nan trabao excelentemente. Danki na e proyecto aki cu nos por a mantene e porcentahe di hogamento abao y unda yiu di e homber y muher humilde cu no por paga pa nan yiunan haya zwemles por tin e oportunidad di siña landa y por ta trankilo cu nan yiunan por landa, pa motibo cu nos ta un isla rondona cu awa y ta ser categorisa mescos cu Hulanda como un waterland. Y pa motibo cu Hulanda ta un waterland e proyecto di landamento ta den curriculum escolar y mi ta haya hopi straño cu Hulanda cu ni a yega ainda te con leu mi sa, ya kier kita algo cu na Hulanda ta di primordial importancia. E ora dicon aki na Aruba e yiu di tera si por wel di ‘bay hoga numa’? Y mi no por ni imagina Aruba un isla rondona cu lama y hotelnan cu pool y cu Landamento escolar mester bay pa scapa placa: kico ta mas importante pa e Minister di Enseñansa: bida di hende den e caso aki di mucha of placa?

No por bay di acuerdo cu esaki!

Gobierno tin hopi mas caminda pa bezuinig y sigur den e hunto pa Aruba e hende ta central y mi no por ni imagina cu Minister di Deporte y Salud sr. Dangui Oduber hamas lo bay di acuerdo cu algo asina cruel pa nos muchanan. Mi no por kere cu Ministerraad den su totalidad por bay di acuerdo cu algo asina, den bista cu e punto di mas importante di e plan di gobernacion ta e hende ta central. Mi ta spera cu ta un fakenews, paso mi no por biba di kere cu nos por ta asina entreguista cu nos no a ni firma nada cu Hulanda ainda y ya nos ta usa excuus ey pa masacra hende y ta con nos lo por para pa e Rubiano si nos mesun hendenan ta bira bira lomba pa nan.

Ami ta bista ta basta!!