Parlamentario Edgard Vrolijk ta presiona pa finalmente gobierno por bin cla oficialmente cu e landsbesluit pa lanta e prohibicion di pisca cu harpun of spearfishing. Den su concepto e landsbesluit ta cla drumi. Solamente mester firm’e, caminda ‘mester laga capricho un banda,’ segun e parlamentario.
E asunto aki ta un di e temanan cu a yega di trece crisis den seno di conseho di minister, entre minister di Medio Ambiente cu ta abstene di lanta e prohibicion aki, y dos minister, Andin Bikker y Chris Romero, kende nan ta na fabor di spearfishing.
Awor desde parlamento, miembro di fraccion di MEP, Edgard Vrolijk a bisa: “Nos mester stop di hunga wega di mucha y ban atende cu e problema aki.” E ta argumenta cu e ‘homber chikito’ cu tambe kier pone pan na su mesa, tambe por tira su pisca y gana su placa.
Pues e ta haya cu no solamente e ministernan y parlamentarionan mester cobra tur fin di luna, sino cu e hendenan cu ta tira pisca cu harpun tambe.
E ta considera e situacion actual como un ‘muchachada’. E ta haya cu mester bin cu e landsbesluit pa lanta e prohibicion aki. Parlamenrio Vrolijk a reitera cu mester beneficia e piscadonan pa nan tambe por tira cu harpun.
