Parlamentario Edgard Vrolijk (MEP): ‘Enseñansa  ta e paspoort pa futuro, pa mañan y ta pertenece na esunnan cu a prepara pa esaki awe’

Mi kier a haci uzo di e oportunidad aki pa por a desea cada alumno, tur docente y tur esunnan cu ta traha den enseñansa un bon comienso di aña escolar 2019-2020. Nos sa cu e trabao di un educador no ta uno facil, uno cu cada dia tin retonan nobo, pero mi persona ta balora e trabao di cada docente cu ta sali traha tur dia na bienestar di nos muchanan y hopi biaha den situacionnan menos adecuado. 

Enseñansa ta e vehiculo pa mehoracion
Enseñansa ta e vehiculo di mas importante di un pais. Un vehiculo cu no mag di tin distincion  y cu un ciudadano den su pais cu haci uzo di e vehiculo enseñanza lo por progresa riba e trapi social di un pais. Pa por logra esaki nos mester enfoca den conscientisa pueblo cu enseñanza mester ta prioridad number 1 na Aruba, pero tambe den nos hogarnan. Nos tin di sigui pusha nos yiunan pa bay scol y caba scol, maske con duro y dificil esaki por bira na caminda, pero nos no mester rindi nunca.  Pasobra na final e comunidad di Aruba lo sali beneficia ora cu nos yiunan di tera por traha y tambe progresa riba nan pais y cu pa medio di educacion nos por logra combati hopi problema cu nos ta enfrentando actualmente, entre otro problemanan social y tambe hudicial.

E hoben di awe y di futuro
Enseñansa na Aruba sigur nos tur ta consciente cu mester trece cambionan pa por prepara e hoben di awe pa locual ta sper’e den futuro cercano. Hopi trabao cu awendia t’ey, lo disparce pero nos muchanan  mester ser prepara a base di 21st century skills cu nan por adapta nan mes na cualkier cambio cu bin den trabao mañan y nan por bay tambe cu e cambionan aki. Banda di esaki mester structura principalmente nos sistema di scolnan di ofishi na necesidadnan cu tin entre otro hotelero, pero sigur un preparacion cu e hoben por acopla su mes na e trabao cu el a studia pe.  Nos ta den e prome etapa di scolnan multilengual cu ta hopi importante unda cu nos muchanan tin e oportunidad di por siña den nan mesun idioma y cu sigur lo mehora nan prestacion den otro idioma stranhero tambe.

Pa termina mi ta convenci cu trahando hunto y den dialogo y transparencia nos por logra hopi mas pa enseñanza pa nos muchanan y nan futuro. Un biaha mas mi ta reitera mi miho deseonan pa aña escolar 2019-2020, pa nos alumnonan pero tambe docentenan y sin lubida e mayornan cu ta e piesa di mas importante den e triangulo escolar. Hopi exito!