Parlamentario Edgard Vrolijk (MEP): ‘Aruba lo conoce pa 2019 na luga di un deficit di 25 miyon florin un surplus di alrededor di 1 miyon florin’

Recientemente CAft tabata di bishita na Aruba y diabierna ultimo nan tabata na Parlamento. Un bishita unda cu CAft a bin informa Parlamento di Aruba di su consehonan, pero tambe a indica kico lo mester tene cuenta cune pa locual ta trata e presupuestonan 2020 y 2021 y cu den futuro Aruba por tin presupuestonan sostenibel y duradero.

Presupuesto 2019.
Cu hopi orguyo nos por a tuma nota cu CAft a confirma na Parlamento cu Gobierno – no obstante tur e retonan financiero y problema di entrada cu Citgo y un debe enorme laga atras unda cu pa 2019 a paga na interes so 232 miyon florin – nos por ta orguyoso cu Gobierno a cumpli cu e normanan stipula, esta cu mester tin un deficit di -0,5% (-25 miyon). Pero lo mas importante ta cu den e tratamento di presupuesto supletorio a resulta cu e deficit pa 2019 lo tabata di 4 miyon na luga di 25 miyon, awor den e ultimo uitvoeringsrapportage a bin resulta cu Aruba lo conoce pa 2019 na luga di un deficit un surplus di alrededor di 1 miyon florin. Un super bon noticia ya cu desde 2008 tabata e ultimo biaha cu Aruba a conoce un surplus financiero bao di Gabinete Nelson Oduber IV.

Desde 2009 cu nos a conoce e famoso cambio di gobernacion cu “tanto pueblo a anhela” bao engaño di cu BBO lo ta mata tur hende y cu ta friends and family so ta ser beneficia, Aruba a ser malogra pa 8 aña cu un gobernacion Mike Eman 1 y 2 cu orguyosamente a endeuda Aruba y nos futuro generacion sin compasion unda cu na 2014 a bati record di mal maneho financiero, cu Aruba a conoce un KB pa mal maneho financiero y cu Aruba a conoce e cifra record di un deficit di 444 miyon florin, mientras cu na 2008 Aruba tabatin un surplus di 51 miyon florin. Den 8 aña di Gabinete Eman 1 y 2 a priminti cielo y tera, cu lo percura pa finansas di Aruba ta duradero y sostenibel y a haci uso di Richard Arends como consehero di e ex ministernan Mike de Meza, Bermudez y Mike Eman, pero nunca por a stabilisa nos finansas publico, pero alcontrario a mara pueblo na man y pia na contractnan y debenan cu lo caba te na aña 2044 y unda cu mester paga anualmente 82.4 miyon florin na proyectonan sin  a percura pa e presupuesto tin e fondo propio pa cubri esaki y manera Mike Eman himself a bisa: “e debe t’ey pa pueblo paga cu orguyo”.

Resumiendo tur e retonan cu Gabinete Evelyn Wever-Croes a bin ta encontra, a percura pa cumpli cu e normanan financiero cu a ser fiha pero a surpasa expectativa y pa esaki a ricibi un compliment di CAFT cu pa prome biaha den su historia cu nan a wak mehoracion serio den finansas di Aruba desde nan existencia na 2015.

Presupuesto 2020.
E retonan pa presupuesto 2020 t’ey sigur unda cu pa 2020 Aruba lo mester tin un surplus financiero di 0,5%, pues mester tin un surplus di 25 miyon florin y pa 2021 esaki lo mester ta 1% pues 50 miyon na surplus. E no ta facil den bista cu nos tin un solo pilar economico cu ta turismo, pasobra e proyecto fracasa Berde (cu lo mester a trece 1600 cupo di trabao nunca a  ni cuminsa), e fantasma di Citgo a disparce pero si a causa daño na e trahadonan y tambe casi tres aña di speransa falso pa pueblo y cu nunca a trece contribucion financiero pa presupuesto di Aruba. Banda di e reto di tin un presupuesto cu un surplus ta bin acerca e factor cu mester keda reduci e costonan di personal cu incluyendo crisisplan mester bay di 482 miyon pa 476 miyon pa 2020 y pa 2021 473 miyon. Sigur riba esakinan ta bin e retonan cu embeyecemento y e retonan di AZV cu manera esaki ta proyecta lo tin su costonan cu ta core den careda di 100 miyon florin e añanan nos dilanti pa locual ta SVB, pero pa AZV esaki lo ta den careda di 200 miyon florin cu lo haci e fondonan aki no sostenibel y mester tuma decisionnan e añanan nos dilanti pa por mantene esakinan sano.

Pues esakinan ta algun di e retonan cu mester tene cuenta cune pa presupuesto 2020 y 2021, pero p’esey mes Gabinete Evelyn Wever-Croes a opta pa sondea opcionnan entre otro pa crea otro pilarnan economico cu lo genera entrada pa pueblo, pasobra no ta husto cu e pueblo aki tin di sigui contribui na e mal gobernacion di Mike Eman di 2009 pa 2017. Den  esakinan a cuminsa e proceso pa crea e posibilidad entre otro pa haci Cannabis Medicinal un pilar economico pa Aruba, diversifica nos Turismo y alabes ta trahando duro pa haci San Nicolas Ports Authority un realidad unda lo por concuri pa reduci prijs pa e pueblo y creando cuponan di trabao y tambe e fast ferry ta parti di e proyecto aki. Banda di esaki lo sigui stimula pa atrae mas barconan crucero pa Aruba. Pues Gabinete Evelyn Wever-Croes ta buscando un balans pa crea entrada y esaki ta necesario si bo tin di paga proyectonan cu mester paga un suma fiho di 82.4 miyon pa aña cu lo caba na 2044 pa por percura cu esakinan ta ser cubri, pero tambe percura cu lo haya entrada di e pilarnan economico nobo aki y crea cupo di trabao pa nos hendenan.

Resumiendo e retonan pa 2020 ta hopi grandi, pero nos tin sigur cu Gabinete Wever-Croes liderisa door di nos Promer Minister Evelyn Wever –Croes y nos Minister di Finanzas y Economia Xiomara Maduro lo percura pa nos cumpli cu e normanan di presupuesto 2020 y tambe trece alivio den pueblo den tur e situacion precario cu nos a encontra e pais aki ora a drenta gobernacion na november 2017.