1 di januari 1986 Aruba a conoce un structura nobo despues di un lucha di hopi aña y cu a ser concretisa door di nos lider inmortal Betico Croes y cu tur aña ta ser conmemora dia 25 januari como e libertador di Aruba. E lucha pa nos por ta “baas in eigen huis” no tabata uno facil y sigur den un structura unda como pais bo tabata den minoria, a sa di logra pa Aruba por ta un pais autonomo den Reino Hulandes y sigur como pais autonomo bo por tin bo propio identidad,pues di por tin bo propio himno y bandera, moneda y sigur su propio instancianan manera banco Central, su propio gobernantenan y su mesun parlamento y cu ta categorisa e autonomia di un pais. Nos gran lider inmortal Betico Croes a pidi nos pa cuida nos Status Aparte manera un clompi diamante paso e tabata sa e importancia di por ta liber y tuma nos propio decisionnan y esaki a percura pa Aruba por a conoce un explosion economico mas grandi cu cualkier isla den nos region. Pero lamentablemente historia ta mustra nos cu nos no a sa di cuida nos Status Aparte manera un clompi diamante, pero mas bien a mal uza e balor di esaki pa por a tuma decision financiero y economico pesimo den e pais aki y awe cu Covid ta mustra nos con vulnerabel nos isla ta pa factornan externo. Y na e momentonan aki 35 aña despues nos tin den nos man pa destrui tur locual nos tin manera nos opositornan politico ta desea of nos ta bay reconstrui y percura pa nos Status Aparte por ta uno fuerte y cu por garantisa e futuro tan anhela cu Betico Croes tabata kier pa su pueblo.

Historia di Aruba ta skirbi y no por ser cambia

Tristesa cu ainda 35 aña despues di Status Aparte ainda Aruba como pais su historia ta ser troci. E ta un berguensa ora bo wak paisnan cu tin mas 200 aña di historia y den e proceso di 200 aña aki hamas a conoce ningun cambio y pio ainda ningun gobierno no tribi mes di cambia of cuestiona nan historia, pero al contrario ta orguyoso di nan historia y sigur tur aña ta celebra dia di nan independencia na forma grandi y den union y cu ta e simbolo di mas grandi di un pueblo. Aruba su historia ta skirbi y marca y no por ser cambia. Nos a conoce lidernan manera Juancho Irausquin y Shon A. Eman cu a cuminsa e lucha pa Aruba por ta liber,pues pa Aruba por ta autonomo den Reino Hulandes, pero circunstancianan a cambia y a pone e lucha un banda. Pero danki na e movecionnan aki nos gran estadista Betico Croes a sigui cu e lucha aki cu a costa su persona sudor y sanger pero a logra pa Aruba haya su Status Aparte dia 1 di januari 1986. Lamentablemente te su persona hamas por a logra di wak ni biba y ni disfruta di e frutonan di su logro y cu hasta na eleccion di 1985 pueblo a vota pa un gobierno gelapi y cu un Prome Minister cu semper a bringa e lucha di Betico Croes. Pero esey ta e realidad y historia ta skirbi y marca kende tabata e Prome Minister di Aruba y nos ta respeta esaki y ta parti di nos historia. Mi ta kere cu a yega ora pa nos stop e division cu tin den pueblo ta ken a logra Status Aparte y ban respeta nos historia y tambe reconoce e lucha di esunnan cu mi a menciona, y sigur acepta tambe cu asina e historia ta y cu tin cu a haci mas cu otro pa logra e Status Aparte.

Covid a mustra nos cu ta momento di reconstrui nos pais y fortalece nos Status Aparte

Covid a mustra nos con vulnerabelnos Status Aparte ta ora bo no cuida esaki. Covid tabata e top of the iceberg, unda cu di 2009 pa 2017 a bin ta hiba un maneho financiero y economico deplorabel, unda cu hasta na 2015 a bin un entidad di control cu nos conoce como CAFT. Asina mes nos pais a keda endeuda, sin un maneho financiero sano y sin percura pa crea mas pilarnan economico y cu awe cu Covid a dal nos, a mustra nos con vulnerabel nos ta. Di 2017 a bin ta traha duro pa stabilisa finanzas di Aruba y a logra esaki tambe, pero tin cosnan cu no ta den nos man, pero si nos tin di siña di nan manera tabata e caso di Covid-19. Na e momentonan aki nos ta den un etapa di transformacion, unda cu nos ta dal dos stap atras pa nos por bin mas fuerte cu nunca dilanti. Na e momentonan aki nos como pais a acepta ayudo di Hulanda pa un periodo di 6 aña unda cu asistencia di Hulanda nos por logra haci nos finanzas sostenibel,pero sigur tambe percura pa recuperacion di nos turismo, crea pilarnan economico nobo cu e pais aki mester di dje pa nos por sali un biaha mas dilanti. Banda di esaki mester enfoca pa reenforsa nos derecho di estado pa por garantisa cu nos tin bon gobernacion paso sino tur trabao duro di Gabinete Eevelyn Wever- Croes pa reconstrui Aruba lo bay perdi. Den esaki nos a percura caba pa e ley di financiamento di partidonan politico, ley di destaho publico y sigur pa e aña 2021 lo bin un biaha mas cu e ley di screening di Ministers y prome cu pueblo bay urna electoral por wak ken den Parlamento of cua partidonan politico ta para pa bon gobernacion y gobernantenan integro y kennan no. Sigur lo bin mas cambio nan den nos constitucion pero sigur tambe den e Reglement van Orde di Parlamento.

Mi kier a desea pueblo di Aruba hopi pabien cu 35 aniversario di nos Status Aparte y sigur cu e lunanan nos dilanti nos lo sigui traha pa percura pa nos pais supera e retonan financiero y economico cu nos ta afrontando y sigur percura pa un biaha mas nos autonomia por ta mas fuerte cu nunca. Y e unico manera cu por logra esaki ta den union.