Manera ta conoci 30 di maart 2021 tur minister di Gabinete Wever-Croes a entrega nan retiro y Minister President a pidi Gobernador pa disolve parlamento.
A base di diferente whatsapp, mensahe y yamada cu mi a haya como parlamentario, mi por conclui cu hopi hende ta preocupa pa loke ta trata e yudansa financiero cu te awor nan ta ricibi for di gobierno. Pa medio di e comunicado di prensa aki mi kier purba trece e trankilidad na tur esnan cu ta canando cu mesun preocupacion.
Diamars Minister President, sra. Evelyn Wever-Croes, a enfatisa cu como gobierno demisionario nan lo sigui atende cu asuntonan coriente te ora un otro gobierno keda nombra. Maneho di entre otro corona crisis y su consecuencianan, ehecucion di e landspakket y palabracion cu Hulanda pa haya financiamento y mas cu claro maneho general di e pais ta cay akibou.
Pueblo por ta garantisa cu gobierno lo sigui duna FASE y demas yudansa financiero cu te cu awor a keda duna. Mi tin e siguransa di esaki mirando cu Gobierno tin acuerdo firma caba cu Hulanda pa loke ta trata e fiansa pa e di dos kwartaal, duste cu fin di juni 2021. Na mes momento e entrega di solidaridad di parti parlamentario, minister y sector publico ta continua. Cu otro palabra e fondonan necesario pa por sigui cu e yudansa nan acostumbra na nos hende y companianan ta na su lugar.
Por cierto ta bon pa menciona cu ya di siman pasa Minister Glenbert Croes a informa pueblo cu FASE a keda aproba pa full 2021. Dus na tur cu ta preocupa, keda bo trankil, bo mester just percura pa registra den e prome 10 dianan di cada luna, percura pa yena tur informacion corectamente y cumpli cu e rekisitonan. Mescos ta conta pa e demas sosten financiero cu Gobierno a bin ta dunando.
