Dia 2 di october 2019 a inicia cu tratamento di e Ley di Cambio di Serlimar. Tromp-Lee ta remarca cu ta prome biaha desde cu el a bira parlamentario cu el a experiencia cu tur 20 representante di pueblo a hiba palabra. Tabata un dia hopi largo y apenas a logra termina cu e prome tanda.

Segun Shailiny Tromp-Lee, Fraccion di MEP a encamina un proceso amplio caminda a sinta cu diferente stakeholders e.o ATIA, KVK, AHATA, Ecogas/Ecotech, Arcadis y Stichting Parkietenbos. Mas cu claro a reuni tambe y a haya presentacion diferente biaha door di e minister encarga. E reunionnan aki a conduci na hopi pregunta y sugerencianan, cual na mesa di reunion a keda trata y discuti cu minister.

E proceso aki a conduci cu na inicio di e reunion publico ya caba minister a presenta un prome nota di cambio caminda el a duna atencion na algun di nos preocupacion y sugerencianan presenta. Simultaneamente Fraccion di MEP, preparando pa e reunion a traha riba un amienda cu a haya su debido atencion durante prome tanda.

Tromp-lee ta indica cu durante e reunion publico e por a tuma nota cu opositornan tabata trata e Cambio di Ley di Serlimar mescos cu e ta e Ley di Minister pa pidi mandato pa realisacion di un incinerator. Mas remarcabel ta cu Tromp-Lee ta bisa cu e por a scucha y mira e reaccion di publico presente cu a pone realisa mas y mas cu esaki ta e impresion general cu ta existi y cu a ser crea. Tromp-Lee ta pensa cu banda cu ya pa algun tempo tin informacion y link incorecto a keda haci pa cu e ley aki, articulo 1 A lid c den e Cambio di Ley tambe ta hunga un rol. E articulo aki ta bisa, Tromp-Lee ta cita e ley: ‘omschrijving beheer van afval: c. beheren en exploiteren van een plant waar afval, die bestemd is om te verbranden in een grote, gesloten verbrandingsoven, in ontvangst wordt genomen’.

Mirando cu no obstante e echo cu na inicio di reunion minister a enfatisa y subraya  cu e ley aki no tin nada di haber cu un incinerator y hasta a duna un splicacion cortico den ki fase nos ta ainda pa loke ta trata e proceso pa scoge e tecnologia cu lo keda scogi pa den futuro nos bay procesa sushi aki na Aruba, Tromp-Lee a haci e peticion na minister pa evalua seriamente pa saca e lid c aki for di e ley. Na final di prome tanda minister a informa di lo haci esaki. Tromp-Lee ta spera cu asina por crea toch un poco di trankilidad. Tromp-Lee ta di opinion cu na momento cu Gobierno tuma decision na ki manera nos ta bay procesa sushi aki na Aruba, lo percura pa e leynan necesario.

Por ultimo Tromp-Lee a pidi minister pa splica pueblo un biaha mas, pa pueblo mes por scucha, con e proceso pa cera Parkietenbos lo ta, cuanto tempo e ta bay tuma y kico ta e plannan pa sanea y desaroya e localidad. Durante reunion opositornan tabata enfatisa e echo cu den e ley na ningun caminda ta para cu ta bay cera Parkietenbos y Tromp-Lee ta remarca cu na su luga, Minister a contesta nan cu e ceramento di Parkietenbos ta forma parti di e maneho di Gobierno y no ta keda poni den un ley. En berdad ora ta haci politikeria ta mal informa pueblo mientras nan sa miho.

Tromp-Lee ta termina bisando cu manera poni den Programa di Gobernacion Gabinete Wever-Croes lo percura pa cera, sanea y desaroya Parkietenbos.