Esey ta e mensahe cu Parlamentario di Partido Pueblo Arubano (AVP) a bin cune diamars mainta durante e conferencia di prensa semanal di e partido. Wyatt-Ras a condena e echo cu Minister di Salud Publico, Dangui Oduber a elogia su gobierno pa e logro di acreditacion JCI (Joint Commission International) cu Instituto Medico San Nicolas a obtene recientemente.
Despues di a felicita directiva y ekipo completo di ImSan pa e acreditacion cu ta permiti nan funciona na un nivel mas competitivo y cu respaldo di un institucion manera Baptist Health di Florida, e parlamentario a coregi Minister Oduber su ponencia cu merito ta di Gabinete Wever-Croes.
“Un logro hopi grandi. Un proceso cu a inicia di hopi aña atras,” asina Wyatt-Ras a bisa referiendo na e iniciativa cu e titular di salud publico di Gabinete Mike Eman, esta Richard Visser. A tuma mas cu dies aña pa realisa e vision di partido AVP. Awo e acreditacion lo yuda eleva e calidad di servicio cu ta brinda y lo haci posibel cooperacion internacional cu otro institutonan.
E parlamentario di AVP ta kere cu, na luga pronkia cu pluma di otro, Minister Oduber mester preocupa su mes mas pa su posibel rol den e investigacion penal, manera esun Vacuna Gate caminda su empleado y campañadonan a bay cera pa motibo di fraude cu certificacion di vacuna.
E titular actual di salud publico mester asumi su responsabilidad pa e fraude aki. Tambe e tin cu busca un solucion pa e restriccion cu tin den remedi cu AZV ta cubri (austerisacion di e positieve lijst), na luga di felicita su mes pa trabou cu e no a haci.
