Parlamentario drs. Mervin Wyatt-Ras a tuma nota di e ley cu a drenta Parlamento cu ta regarda introduccion di BBO na frontera. E ley aki ta otro medida cu Gabinete Wever-Croes ta tuma riba pueblo di Aruba. Un medida cu tambe ta sali for di e landspakket cu Evelyn Wever-Croes a firma cu Hulanda na mei 2020 sin consulta cu pueblo di Aruba, ni gremio comercial ni sindicatonan.

Sin piedad Wever-Croes ta scoge pa corta den alma di nos hendenan. Tanto cu el a critica cu gobierno di AVP a hisa nos debe nacional ora cu AVP tabata den gobernacion. Despues di esaki a bin tuma nota cu e debe no tabata 90% di GDP manera cu MEP y su amigonan a gaña pueblo sino 70%. Ora cu MEP a bin den gobierno hunto cu partido POR y RED si a manda dicho debe ey masha halto mes.

Zogenaamd pa yuda nos hendenan den tempo di COVID a usa como argumento pa manda dicho debe asina skyhigh sinembargo a keda beneficia nan amigo y famianan, buffetnan di abogadonan lia na nan, servicionan y gastonan di luho di gobierno. Mientrastanto gobierno di Gabinete Wever-Croes mes a propone Hulanda pa corta den cuido 5.5%, tambe 60 miyon florin y pa tuma medidanan manera subida di BBO, BAZV y awor BBO na frontera. Tur e medidanan aki (t)a afecta nos ciudadanonan directamente den na cartera y ta haci nos hendenan mas pober.

Ya caba tin un cantidad di ciudadano ta biba na rand di minimo y no por paga ni cuminda. Prijs di tur comestibel a subi. Tarifa di awa, coriente y gas a bay halto. A subi schoolgeld dor di cual muchanan di menos recurso lo mester bay keda sin bay scol. Tambe tin cu paga hasta pa medicina dor di cual un cantidad di ciudadano tin cu keda cu nan malesa paso nan no por paga pa remedi, loke a conduci na cuido di klasse of “klassezorg”. Awor te hasta ta corta den nos grandinan cu a traha asina duro pa nos pais y kisas lo mester cera parti di e facilidad di SABA. Tur e cortamentonan aki tin impacto no solamente ariba entrada y poder di compra di cuidadanonan sino tambe riba e sector social.

Mas y mas ciudadanonan ta sufri di stress y di depresion, locual tin su impacto riba e yiunan cu ta biba den famianan cu ta pasando situacionnan dificil financieramente. Paso un mama of tata cu no por pone pan ariba mesa di su famia dor e no tin trabou of e tin debenan cu e no por paga ta expresa su malcontento y stress riba su pareha y su yiunan. Ta lastima cu no tin cifra di aumento di problemanan social paso e mesun gobierno cu a grita cu tabatin crisis social, awe ta haci comosifuera tur cos ta bay bon riba tereno social. Hasta a cera parti di Respaldo y manda pashentnan cas, cu tur consecuencia cu esaki tin pa e clientenan y na nan famia. Pero ta haci comosifuera no tin problema social, siendo cu awor si nos por papia di un crisis social real.

Raad van AdVies su reaccion ariba e ley encuanto BBO na frontera, e asina landsverordening Belastingplan 2023 deel III), ta devastador. Raad van Advies no ta di acuerdo cu meta ni contenido di e ley y ta pidi pa no mand’e Staten. E ley aki segun Raad van Advies ta contra e pretension di gobierno pa introduci ley fiscal den fase. Segun Raad den e ley no ta menciona e efecto di e ley riba subida di prijsnan. En bista cu BBO na frontera lo ta halto esta 7%, esaki lo tin su impacto grandi riba prijs dor di e efecto acumulativo di BBO. Consumidornan ta ser confronta cu inflacion halto durante ultimo añanan. Dor di aumento di BBO desde januari 2023 consumidornan ya caba ta ser confronta cu subida drastico di prijsnan y rebaho di poder di compra y limitacion di accesibilidad na productonan. Si intencion di gobierno ta pa mehora calidad di bida di ciudadanonan, baha costo di bida, aumenta desaroyo y mehora e bida (leefbaarheid) pa nos ciudadanonan, esaki no ta e manera pa logra esey.

Hecho ta cu gobierno ta bisa algo y ta haci totalmente diferente. Tambe por constata discrepancia entre ministernan. P.e. mientras cu un minister den e coalicion kier baha e “cost of doing business” y aumenta inversion, e otro minister dor di e medidanan ta hisa e “cost of doing business” dor di cual inversionnan lo baha. Un minister ta bay pues pariba y e otro pabou. Un gobierno pues sin pia ni cabes. Tampoco no ta tene cuenta cu e impacto riba nos turismo y inversionnan den esaki.

E consecuencia pues no ta solamente pa comercio y gremionan, sino en general pa nos pueblo cu lo bira mas pober ainda. Segun. Wyatt-Ras con ta posibel cu gobierno kier bulldoze e ley aki sin consulta cu esnan cu ta bay ser mas afecta y tin cu carga nos economia.

Wyatt-Ras ta mira cu gobierno no ta interesa den opinion di niun hende sino kier corta den tur cos pa por keda cu placa pa sigui paga su gastonan di luho. No ta importa si nos hendenan ta biba den pobresa of cu comerciantenan tin cu cera nan negoshi basta e ministernan por core den auto di ultimo modelo y di coriente cumpra cu placa di pueblo, basta nan por keda biaha, basta nan por keda paga famia y amigonan pa servicionan y consehonan di abogadonan y tur otro gastonan di fiesta y biahe. Wyatt-Ras ta spera cu Presidente di Parlamento yama e reunionnan cu ta ser pidi dor di fraccion di AVP pa por scucha na opinion al respecto.