E Candlelight Vigil realisa door di miembronan di comunidad contra clausura di John Wesley College ta un momento cu pa Parlamentario di Partido di Pueblo Arubano (AVP), drs. Arthur Dowers a sirbi como fuente di inspiracion y forsa pa sigui traha na fabor di comunidad y na defensa di enseñansa.
E ex minister di enseñansa den gobernacion anterior di AVP a keda recorda con ceramento di scol ta un custumber di partido MEP ora cu nan ta na mando. “Nan a cera Universidad y enseñanza nunca tabata un prioridad, pero loke mi ta haya hopi grave ta caminda nos ta ripara cu ta San Nicolas hustamente, cu tin hopi problema pa su desaroyo,” asina Dowers a indica bisando acerca cu “Luga di bo sosten’e pasobra San Nicolas merece un extra sosten.”
E parlamentario ta convenci cu San Nicolas merece miho di loke nos ta mira awe. Tempo AVP a asumi su responsabilidad di dirigi Aruba, a haya e situacion cu MEP kier a cera Colegio pariba. Na luga di haci esey, AVP a amplia Colegio San Nicolas. Y semper ta e mesun storia: loke MEP kier destrui, AVP ta rescata pa despues e propio politico di MEP sinta den prome fila tur djente afo ta gaba cu e trabou di otro hende, pero ora nan tin oportunidad pa haci e trabou, bo no por haya nan, segun Dowers.
Y no ta limita na enseñansa, pasobra pa e proyectonan PPP di Green Corridor y Watty Vos Boulevard cu cual AVP a mehora e fluho di trafico entre San Nicolas pa e resto di e isla pa fomenta mayor inversion y desaroyo, tambe te dia di awe MEP tin masha problema.
Tur cu tabata presente na e candlelight vigil pafo di e scol, consistiendo di varios generacion, a inspira e parlamentario pa sigui lucha pasobra a ripara cu loke nan ta haci no ta por nada; e ta pa e comunidad. John Wesley ta un scol cu a hunga un rol importante den bida di San Nicolas y di pueblo di Aruba.
