Parlamentario di Tweede Kamer, Raoul White kier mira mas participacion di Hulanda den Educacion, Deporte y otro sectornan di Aruba

Miembro di Tweede Kamer na Hulanda, Raoul White (GroenLinks-PvdA) ta boga pa un papel activo di Hulanda den e mehoracion di e calidad di educacion na Aruba, Corsou y Sint Maarten (islanan CAS.) El a expresa esaki durante un debate den comision cu Secretario di Estado pa Relacionnan di Reino, Zsolt Szabo, comparti pa e website noticiero, Koninkrijkrelaties.

“Un bon educacion ta e base imprescindible pa hendenan por desaroya plenamente,” el a afirma durante e debate cu e Secretario di Estado. “Mi ta consciente cu e paisnan ta e principal responsablenan. Un bon educacion ta ofrece hobennan e oportunidad pa participa plenamente den sociedad y tambe ta evita, por ehemplo, cu nan ta cay den criminalidad. Igualmente, un bon educacion ta e base pa un economia sostenible y stabiel.

“Actualmente nos ta observa cu tin hopi preocupacion na e islanan tocante e calidad di enseñansa. Esaki tambe ta provocando un ‘brain drain’. P’esey mi lo kier pidi na e Secretario di Estado pa, hunto cu e paisnan, explora con Hulanda por duna sosten den e mehoracion di calidad di Educacion,” White a declara.

“Awe mainta, ora mi a drenta edificio di Parlamento, mi a encontra di nobo cu e exposicion tocante e 70 aña di Statuut di Reino. E exhibicion aki ta simbolisa pa mi cu den e Parlamento aki nos ta tuma decisionnan cu ta afecta henter Reino, incluyendo e paisnan Caribense.

“Na prome lugar, e situacion geopolitico. E situacion aki ta cambiando rapidamente y por tin consecuencia pa henter nos Reino. E futuro presidente di Merca a pone atencion riba teritorionan di otro paisnan y nos ta mira tambe, por ehemplo, cu China ta purba eherce cada biaha mas influencia, tambe den Caribe. Gobierno tin un vision cla di e menasanan aki, y e Gabinete ta trahando pa contraresta e influencianan no desea aki? Durante e debate di presupuesto, a aproba un mocion presenta pa mi coleganan Ceder, Bamenga y mi persona. Con ta bayendo cu e implementacion di e mocion aki?” White a puntra.

Lectornan di Bon Dia Aruba por recorda cu na november ultimo, Don Ceder (ChristenUnie), Mpanzu Bamenga (D66) y Raoul White (Groenlinks-PvdA) a entrega un mocion tocante influencia di China den e paisnan Caribense di Reino. Den un carta na Tweede Kamer riba e asunto, minister di Exterior a expresa preocupacion pa e influencia economico creciente di China na Aruba, Corsou y Sint Maarten.

Den un carta dirigi na presidente di Tweede Kamer, minister di Asunto Exterior, Caspar Veldkamp na comienso di november, e minister ta nota cu e paisnan di Caribe den Reino ta autonomo den creacion di relacionnan internacional economico. E principionan di politica exterior ta establece e marco pa esaki. E vulnerabilidadnan den ambito di seguridad economico en relacion cu inversionnan stranhero tambe por tin consecuencia pa Reino en su totalidad. Den e sentido aki, e influencia economico creciente di China den e region en general ta relevante.

Ministerio di Asunto Exterior ta sigui di manera general e actividadnan di China den e region y ta mantene un dialogo continuo cu e paisnan tocante esaki. E nota di politica di Reino, ‘Hulada-China: un ekilibrio nobo’ ta fungi como marco pa esaki.

Continuando den e debate, White a bisa: “Tocante educacion, mi ta consciente cu e paisnan ta e principal responsablenan. Pero tambe, nos tur sa cu un bon educacion ta un base imprescindible pa desaroyo di hende – y manera mi grupo parlamentario lo bisa: pa nan progreso. Un bon educacion ta ofrece hobennan e posibilidad pa participa plenamente den sociedad y ta preveni, por ehemplo, cu nan ta cay den criminalidad.”

White a continua dunando comentario riba seguridad y estado di derecho. “Pa GroenLinks-PvdA, ta fundamental cu e cuatro paisnan di nos Reino tin un estado di derecho cu ta funciona corectamente. Y cu Reino, den su conhunto, desempeña un papel importante den e garantia di estado di derecho. Sinembargo, tin preocupacion tocante esaki. Permiti mi menciona algun ehemplo: e lucha contra corupcion y e despliegue suficiente di polis, atencion forense, como tambe proteccion di e refugiadonan cu ta yega, por ehemplo, for di Venezuela. Mi grupo parlamentario ta preocupa pa e cuestionnan aki. E paisnan tin suficiente capacidad policial pa mantene orden adecuadamente? Tin perspectiva di un solucion pa un clinica di tratamento penitenciario (TBS) den e parti Caribense di Reino? Y con ta para cu e situacion tocante e trato di refugiadonan, specialmente awo cu, despues di eleccion na Venezuela, tin posibilidad cu mas persona lo yega? Mi lo kier ricibi un update di e Secretario di Estado riba e puntonan aki,” el a bisa.

Continuando, el a bisa cu un tema importante pa GroenLinks-PvdA ta cambio climatico y e medidanan na paisnan CAS. “Aña pasa, lamentablemente, nos a bolbe experimenta un aumento notable den temperatura. Den Caribe, tambe nos ta mirando e consecuencianan di esaki, cu probablemente ta bay bira mas evidente ainda den futuro. Mi ta preocupa pa loke esaki por nifica pa e islanan. Casi mi no ta scucha e Gabinete papia riba e tema aki. No ta berdad cu, si no ta papia di dje, e problema ta bay resolve riba su mes. E Secretario di Estado ta comparti nos preocupacion? Por splica con e gabinete – hunto cu e islanan – ta trahando riba e lucha contra cambio climatico? Unda e Secretario di Estado ta mira oportunidadnan pa mehora y intensifica e enfoke aki? Y con Hulanda por colabora cu e paisnan CAS riba e asunto aki? Como Reino den su conhunto, nos tin un interes comun den un strategia eficaz contra cambio climatico.”

Den e ultimo desaroyonan tocante e tema aki, december ultimo, na residencia di embahador di Australia na Hulanda, a tuma lugar recientemente un combersacion di mesa rondo riba e retonan relaciona cu cambio di clima, cu e islanan SIDS Small Island Development Staten ta confronta cune.

E seccion aki tabata organisa pa embahada di Australia y Ministerio di Asuntonan Exterior di Hulanda. Meta di e combersacionnan tabata cu representantenan di sector publico, sector priva y otro institutonan a bin acerca pa intercambia di idea riba e materia aki.

Shandra John, hefe di departamento Huridico y Union Europeo di Gabinete di Aruba a hiba palabra den nomber di Minister Plenipotenciario riba e retonan, experencianan y “best practice” di Aruba riba e tereno di cambio di clima. Segun un comunicado di gobierno di Aruba e tempo aya, e tabata un seccion hopi interesante unda na final tur presente por a conclui cu nos tur lo haya nos confronta cu e consecuencianan di cambio di clima, pero cu conhunto nos mester sincronisa cu otro pa asina duna otro e sosten necesario.

Y na april di aña pasa, AHATA a informa cu nan a sponsor e estudio yama CORVI, cu lo delinea kico ta e riesgonan exactamente cu Aruba tin, “pasobra ora bo tin un plan di riesgo special, e ora bo tin cu crea e accionnan cu bo mester tuma pa mitiga e problema di global warming specialmente pa Aruba,” CEO di AHATA, Tisa LaSorte a menciona e tempo aya.

Finalisando, White tabatin un ultimo pregunta den e debate, tocante deporte. “Deporte ta un actividad dibertido pa hopi hoben y tambe ta contribui na combati delincuencia. Lo ta bon pa reforsa e oferta deportivo na e partinan Caribense di Reino. E Secretario di Estado ta dispuesto pa traha, por ehemplo, cu NOC*NSF y e federacionnan deportivo pa contribui na e meta aki?”