(NLTimes) – Parlamentario di Sint Maarten Rolando Brison a pidi e pais su minister di finanzas paga su salario den Bitcoin Cash.
E transaccion a tuma luga anteriormente e siman aki. E criptomoneda aki a origina den aña 2017 como parti separa di Bitcoin, e criptomoneda digital mas grandi den e mercado. Esencialmente ambos criptomoneda ta mesun, sinembargo e transaccionnan ta tuma luga cu un cierto set di reglanan. Varios persona a expresa cu nan no ta di acuerdo of gusta e reglanan pa cu transferencianan di Bitcoin, cual a causa cu Bitcoin a actualisa nan ‘software’ unda cu a crea Bitcoin Cash cu un set diferente di reglanan pa cu transaccion, dunando e personanan un otro opcion.
Bitcoin a yama Bitcoin Cash un “criptomoneda innovativo, conveniente y cu ta creciendo rapidamente.” Te cu awo, no tin otro politico den e parti Caribense di e Reino Hulandes cu a indica cu nan kier ricibi nan salario den criptomoneda. El a declara cu e ta e prome oficial elegi cu a ricibi su salario den Bitcoin Cash.
Brison a bisa cu e tin hopi tempo ta investiga e desaroyonan rond di criptomoneda pa varios aña caba. E ta apoya e amplificacion di su uso y e adopcion di criptomoneda, causando cu e ta mira e acto di ricibi su salario den Bitcoin Cash como un paso logico. E politico kier pa Sint Maarten presta mas atencion na criptomoneda y pa haci tur loke nan por pa bira un region clave den sostene e monedanan digital aki. “Mi ta kere cu Sint Maarten tin e chens di bira e ‘Crypto Capital di Caribe’ si nos sigui acepta y desaroya criptomoneda y tur e beneficio cu e tecnologia aki ta trece,” el a bisa den un declaracion.
