26 reunion entre parlamentario Mexico – Cuba a culmina cu compromiso pa impulsa varios acuerdo comercial, turistico, educativo y di salud entre ambos nacion, asina tambe fortalece sistema politico y diplomacia pa para fuerte contra tur hostilidad di presidente Mericano Donald Trump, pa paisnan di America Latino y Caribe.
Durante fin di siman legisladornan di Mexico y Cuba a reuni pa intercambia opinión y establece algun acuerdo. Na final e tema constante tabata discurso contra Trump. Senado y diputado Mexicano y Cubano a manifesta solidaridad. Delegacion di Cuba a duna apoyo na Mexico y a solicita un trato di igualdad entre estadonan y respet pa dignidad di tur pueblo. Delegacion Mexicano a papia tocante blokeo comercial y financiero di Merca contra Cuba.
Esteban Lazo Hernández, presidente di Asamblea Nacional di Poder Popular di Cuba a bisa cu paz ta un principio pa logra independencia, soberania y desaroyo di tur pueblo, no pa discurso ofensivo manera discurso di Trump contra Mexico. Cuba no ta laga Mexico su so. Cuba y Mexico uni ta vence den tur tarea pa logra un bida miho di nos pueblo y di nos ciudadanonan.
Lazo Hernandez a solicita tambe avansa y enfrenta tur politica di Merca. “Awe nos mester ta uni, y asina nos por bira mas fuerte y duna cara na tur cos cu por bin”, Lazo Hernandez a expresa. Jorge Carlos Ramirez a considera cu solidaridad Cubano ta fundamental dilanti di tur atake di Trump contra America Latino y Caribe.
